Ўзбекистондан четга чиқиб ишлаётганларнинг кўпчилиги ноқонуний меҳнат муҳожирлари ҳисобланади.
Қизилўрда вилояти ҳуқуқни муҳофаза қилиш органлари Қозоғистонда ноқонуний ишлаб келган 60 меҳнат муҳожирини Ўзбекистонга чиқариб юборган.
Текширув натижаларига кўра, "Эльта" ва "Орал дизайн стройсервис" корхоналари Шиели, Аральск ва Саксаульскдаги темир йўл вокзалларини таъмирлаш ишларига қозоғистонлик ишчиларнинг ўрнига ноқонуний меҳнат муҳожирларидан фойдаланиб келган.
Ўзбекистонлик муҳожирлар арзон ишчи кучи ҳисоблангани учун қозоғистонлик ишбилармонлар уларнинг меҳнатига мурожаат қилишган.
Қонунбузарлар милиция ходимлари томонидан ҳибсга олиниб, ватанига қайтарилган.
Қозоғистонда ишлаш ҳуқуқига эга бўлмаган кишилар меҳнатидан фойдаланган шахслар эса жаримага тортилгани хабар қилинади.
Айни пайтда Ўзбекистоннинг миллионлаб фуқаролари ишсизлик туфайли тирикчилик илинжида мамлакат ташқарисида меҳнат қилишга мажбур.
Меҳнат муҳожирларининг аксарияти Россия ва Қозоғистонда оғир ишларда банд бўлиб қолмоқда.
