Биринчи президент невараси яшайдиган Лондондаги қасрсимон уй қайси пулга олинган?

Британиядаги келиб чиқиши номаълум бойликларни текшириш жараёнида мустақил Қозоғистоннинг биринчи президенти невараси яшайдиган мулклар музлатилган.

Лондоннинг энг башанг мавзеларидан биридаги қаттиқ қўриқланадиган ҳашаматли уй, ҳужжатларга қаралса, Нурсултон Назарбоеванинг невараси Нурали Алиев яшайдиган манзилдир.

Солиқ жаннатларида жойлашган ширкатлар эгалик қиладиган бу кўчмас мулк ҳозир ҳибсда.

Бу дегани - уни маҳкама қарор бермагунча, сотиш ё бировга бериш мумкин эмас.

Бино жуда катта қасрсимон уй: унинг ертўласида чўмилиш ҳавзаси ва кинотеатр бор.

Алоқадор мавзулар:

Лондонда 20 миллион долларга бозорлик қилган Замира Ҳожиева

Ўзбекистон Британия: Гулнора Каримова мулкларини қайтариш сўралди

100 миллион долларлик мулк

Олий Маҳкама ушбу қасрсимон уй ва Алиевлар оиласига тегишли яна иккита қимматбаҳо мулкни кўриб чиқади.

Маҳкама жараёнида мулкка эгалик қиладиган ширкатларнинг адвокатлари Давлат Жиноят Агентлиги бошлаган текширувларни тўхтатиб туришга интиладилар.

Келиб чиқиши номаълум бойликларни текшириш жараёни Британияда янги таъсир воситаси сифатида ўртага чиқмоқда.

Бунда ноқонуний, яъни жиноий йўлда топилган пулларга сотиб олинган кўчмас мулк объектлари текширилади.

Давлат Жиноят Агентлиги мулк эгаларидан қимматбаҳо уй-жойларни қандай пулларга сотиб олишганини очиқлашни талаб қиладилар.

Агар мулк эгаси изоҳларидан қониқишмаса, маҳкамага мурожаат қилинади ва мулкни мусодара қилиш сўралади.

Ўтган май ойидан бери Қозоғистон собиқ Президенти Нурсултон Назарбоевнинг авлодларига бориб тақаладиган жами 80 миллион фунт стерлинг ( 100 миллион АҚШ долларидан кўпроқ) турадиган учта кўчмас мулк текширилмоқда.

Уларга эгалик қиладиган иккита ширкат - Manrick Private Foundation ҳамда Alderton Investments Ltd бу уйларни сотиб юбормаслиги учун мулклар музлатилган.

Ширкатлар 2014 йилдан бери ушбу уйларнинг эгаси.

Назарбоев авлодлари

Оммага очиқ ипотека ҳужжатларига биноан, уйларда Алиевлар - Нурали ва Айда яшашади.

Жаноб Алиев LinkedIn саҳифасида ўзини қозоғистонлик ишбилармон ва сармоядор сифатида тасвирлайди.

Унинг бобоси Нурсултон Назарбоев қарийб 30 йил давомида нефтга бой Қозоғистонни бошқарган.

Нуралининг онаси Дариға Назарбоева собиқ президентнинг қизи ҳамда Қозоғистон Сенати раисидир.

Дариға Назарбоеванинг собиқ ва марҳум эри Роҳат Алиев эса Назарбоев ҳукуматида катта амалдор бўлган, бироқ кейинчалик ўзини мухолифатчи, деб атаган.

2015 йили Роҳат Алиев Австриядаги қамоқхонада ўлик ҳолда топилганди.

У, афтидан, ўзини ўлдирган.

Роҳат Алиев Қозоғистонда икки банкирнинг ўлдиришига оид айбловлар билан маҳкамага юз тутиши кутилаётган эди.

Би-би-си кўчмас мулкларнинг эгалари ҳамда Алиевларнинг адвокатлари билан боғланди.

Бироқ улар сешанба кунга мўлжалланган жараён олдидан изоҳ бермадилар.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek