Тожикистон “Озодлик радиоси” мухбирларини аккредитациядан маҳрум қилди
Сурат манбаси, Getty Images
"Озодлик радиоси" раҳбарияти ўзларининг Тожикистондаги олти мухбири аккредитацияси бекор қилинганидан ғазабга келган.
"Озодлик"нинг Тожик хизматидагиларнинг фикрича, Тожикистон Ташқи ишлар вазирлиги "Озодлик" веб-сайтида Президент Имомали Раҳмоннинг қизи ҳақида хабар эълон этилгани учун мухбирларни аккредитацияларидан маҳрум қилган.
"Озодлик радиоси"нинг олти мухбири Ташқи ишлар вазирлигига чақирилганлар ва уларнинг расмий аккредитацияси бекор этилгани маълум қилинган.
"Биз Тожикистон ҳукуматининг ҳаракатларидан ғазабдамиз. Умид қиламизки, бу қарор бекор қилинади", деб айтган "Озодлик радиоси" президенти Томас Кент.
25 ноябр куни "Озодлик"нинг Тожик хизмати веб-сайтида Президент Имомали Раҳмоннинг учинчи қизи Рухшона Тожикистон Ташқи ишлар вазирлигининг Халқаро ташкилотлар бошқармаси ўринбосари этиб тайинлангани ҳақида хабар эълон қилинган.
Хабарда Президент Раҳмон қизининг тайинланиши ҳақидаги янгилик илк бор Тожикистон Ташқи ишлар вазирлигининг сайтида пайдо бўлгани айтилган.
"Озодлик"дан билдиришларича, Тожик расмийлари ушбу янгиликни олиб ташлашни талаб қилганлар.
Рад жавоби олинганидан кейин Ташқи ишлар вазирлиги олти мухбир аккредитациясини бекор қилган.
Бу олти журналистнинг Рухшона Раҳмон ҳақидаги хабар эълон этилишига алоқалари бўлмаган.
"Озодлик радиоси" хабар қилишича, бир неча кун илгари Тожик расмийлари бошқа бир хабарни олиб ташлаш талабини илгари сурганлар.
Бу АҚШ Давлат Департаментининг Америка фуқароларини Тожикистонга саёҳат қилишдан қайтаргани, мамлакатда террор хуружи таҳдиди мавжудлигидан огоҳлантиргани ҳақидаги хабар бўлган.
Бундан олдин Тожикистон ҳукумати "Озодлик"нинг Ўзбек хизмати учун материаллар тайёрлаган Абдуқаюм Қаюмов ва Гулнора Равшан аккредитацияларини чўзмасликка қарор қилганлар ва фаолият юритишни тақиқлаганлар.
Ҳозирча Тожикистон расмийлари мухбирлар аккредитацияси билан боғлиқ ҳодиса борасида баёнот берганлари йўқ.
