Ўзбекистон ҳайъати Ўшга ташриф буюрди

Қирғизистон делегациясининг шу ой бошида Андижонга ташрифи ортидан 26 октябр куни Ўзбекистон ҳайъати ҳам Ўш шаҳрига борди.

140 кишидан иборат Ўзбекистон ҳайъатига Бош вазир ўринбосари Адҳам Икромов бошчилик қилган.

Ўзбекистон ҳайъати таркибида Президент девони ва Ташқи Ишлар вазирлиги расмийлари, Андижон, Наманган ва Фарғона вилоят раҳбарлари, маданият, спорт вакиллари, диний уламолар бор.

Ўзбек делегациясини Дўстлик чегара масканида Қирғизистон бош вазири биринчи ўринбосари Муҳамметқалий Абулғазиев раҳбарлигида расмийлар, жумладан, Қирғизистоннинг Ўзбекистондаги элчиси Дониёр Сиддиқов, Қирғизистоннинг Ўш, Жалолобод ва Боткен вилояти раҳбарлари, оқсоқоллар, жамоат ва маданият вакиллари кутиб олганлар.

Ташрифдан мақсад қўшничилик муносабатларини мустаҳкамлаш экани айтилган.

Ўзбекистонликлар Ўш шаҳрида Қирғизистон халқлари ассамблеяси вакиллари билан учрашганлар, Бобур номидаги драма театрида "Семетей Манас ўғли" дастурини томоша қилганлар.

Шунингдек, маданий тадбирлар доирасида ўзбек делегацияси учун қишлоқ хўжалик маҳсулотлари кўргазмаси билан танишув, Ўш давлат университетида учрашув, тарихий "Сулаймон-Тоғ" га саёҳат уюштириш режалаштирилган.

Ташриф сўнггида расмийларнинг икки томонлама ҳужжатларни имзолашлари кутилади.

Айни шу куни, 26 октябрда Ўзбекистон муваққат президенти Шавкат Мирзиёев ва Қирғизистон Президенти Алмазбек Атамбоев ҳам телефон орқали мулоқот қилиб, икки мамлакат ўртасида ўзаро ҳамкорликнинг бугуни ва истиқболларини муҳокама қилганлар.

Каримовнинг сиёсий вориси - муваққат президент Шавкат Мирзиёев бундан кейинги Ўзбекистон ҳукуматининг устувор сиёсий йўналишларидан бири минтақадаги қўшнилари билан ўзаро алоқаларни яхшилаш бўлишини билдирганди.

Октябр ойи бошида Қирғизистон ҳайъати Андижон вилоятида меҳмон бўлган бўлса, икки ҳафта ўтиб ўзбекистонлик тадбиркорлар Тожикистоннинг Суғд вилоятида меҳмонда бўлдилар.

Ўзбекистоннинг биринчи президенти Ислом Каримов вафоти ортидан расмий Тошкентнинг қўшнилар билан яхши муносабатлар ўрнатишга томон ҳаракатлари сўнгги ўн йилликларда юзага келган таранг муносабатлар яхшиланишига умид уйғотган.