Ўзбекистон ТИВ Афғон ҳарбий вертолётлари борасида изоҳ берди

Ўзбекистон Ташқи ишлар вазирлиги Афғонистонга 57 та ҳарбий вертолётни қайтаришга рози бўлгани ҳақидаги хабарларга изоҳ берди.

Ташқи ишлар вазирлиги матбуот котиби Ахрор Бурханов "Дарё" нашрига хабарлар асоссиз эканлигини маълум қилди.

Бурханов "ҳарбий учоқлар Афғонистонга қайтарилиши тўғрисидаги хабарларни ҳақиқатга тўғри келмаслиги ва ҳолатга Ўзбекистон позицияси ўзгаришсиз қолганини" билдирган.

Олдинроқ BBC манбалари Кобулдаги Ташқи ишлар вазирлигида бўлиб ўтган йиғилишда Толибон ташқи ишлар вазири Муттақий Ўзбекистондан вертолётларни Кобулга қайтаришни сўраганини айтганди.

11 сентябр: Ўзбекистон - Афғон вертолётлари, ташқи сиёсат, Россияга энди аёллар ҳам ёлланмоқдами ва ... хитой тили иккинчи тил бўладими?

BBC манбаларига кўра, Кобулдаги Ташқи ишлар вазирлигида бўлиб ўтган йиғилишда Толибон ташқи ишлар вазири Муттақий Ўзбекистондан вертолётларни Кобулга қайтаришни сўраган.

Бу вертолётлар Кунар зилзиласи каби ҳодисаларда муҳим аҳамият касб этишини айтган.

Pасмий Тошкент бу борада ҳозирча очиқ изоҳ бермади.

Бу хабар, Афғонистонда юз берган даҳшатли зилзила ортидан тарқалгани билан аҳамиятлидир. Манбаларга кўра, жами 57 та вертолёт, жумладан, Ми-17 ва УҲ-60 русумли машиналар қайтарилади.

2021 йил август ойида Афғонистонда ҳукумат қулагач, ҳарбий учувчилар ўз самолёт ва вертолётларини Ўзбекистон ва Тожикистонга олиб чиқиб кетишган эди. АҚШ Мудофаа вазирлиги ўша пайтда Ўзбекистонга 46 та, Тожикистонга эса 18 та самолёт учиб келганини тасдиқлаган.

Олдинроқ Толибон ҳаракати ушбу техникани қайтаришни бир неча бор талаб қилган. Шунга қарамай, АҚШнинг Ўзбекистондаги собиқ элчиси илгари бу самолётларнинг Ўзбекистон назоратида қолишини маълум қилган эди.

Эслатиб ўтамиз, собиқ президент Ашраф Ғани ҳам мамлакатдан учта ҳарбий вертолётда чиқиб кетган. АҚШ Толибон ҳокимиятни эгаллашидан олдин Афғонистон ҳаво кучларини 229 та вертолёт билан таъминлаган эди.

Ўзбекистон мувозанатли ташқи сиёсат юритишда давом этади

Ўзбекистон Ташқи ишлар вазирлиги шу ҳафта ичида учинчи бор мамлакатнинг ташқи сиёсат стратегиясини баён этди. Унга кўра, Ўзбекистон ташқи сиёсатда Шарқ ва Ғарбдаги барча халқаро шериклар билан мувозанатли ва ўзаро ҳурматга асосланган ҳамкорликни устувор вазифа деб билади. Ташқи ишлар вазирлиги матбуот котиби Ахрор Бурхоновнинг "Gazeta.uz" га берган интервюсига кўра, мамлакат глобал муаммоларга қарши туришга қаратилган ҳар қандай ёндашувни рад этади. Ўзбекистон ҳарбий-сиёсий блокларда иштирок этмасдан, мустақил ва прагматик ташқи сиёсатни олиб боради. Бу сиёсатнинг асосий мақсади Марказий Осиёда барқарорлик ва фаровонликни таъминлашдан иборат.

ШҲТ саммити ҳақида гапирар экан, Бурхонов ШҲТнинг ҳарбий-сиёсий иттифоқ эмаслиги ва бошқа давлатларга қарши қаратилмаганлигини таъкидлади. У ШҲТни Евросиёда ишонч ва яхши қўшничиликни мустаҳкамлашга хизмат қиладиган очиқ ва инклюзив мулоқот платформаси деб атади.

Хитой Президентининг глобал бошқарув тизими ҳақидаги чақириғига жавобан, Ўзбекистон бундай тизимнинг БМТ Уставига асосланиши, адолатли ва инклюзив бўлиши кераклигига ишонч билдирди. Бурхонов Ўзбекистонни минтақалар ўртасида ишончли "кўприк" сифатида кўришини ва барқарор ривожланиш каби соҳаларда глобал ечимларга ҳисса қўшишга тайёрлигини айтди.

Ўзбекистон, шунингдек, Глобал Жануб мамлакатлари билан савдо, инвестиция ва таълим каби соҳаларда ҳамкорликни кенгайтиришга интилади. Бу ҳаракат ташқи сиёсат устуворликларининг ўзгариши эмас, балки "ШҲТ плюс" платформасидан барча манфаатдор давлатлар билан ҳамкорликни мустаҳкамлаш учун кенгроқ фойдаланишга интилишдир. Ўзбекистон ШҲТнинг аъзо давлатлар учун ўзаро манфаатли бўлиши тарафдори.

Навоийда аёл Россия армиясига одам ёллашга урингани учун уч йилга қамалди

Навоий вилоятида аёл Украинадаги "махсус ҳарбий операция" (СВО) учун Россия армиясига ёллашга урингани учун уч йилга қамоқ жазосига ҳукм қилинди. Навоий вилоят судининг апелляция инстанцияси 2025 йил 11-сентабрда бу ҳукмни ўзгаришсиз қолдирди. Бу ҳақда Kun.uz интернет нашри хабар беради.

1981 йилда туғилган Н.У. исмли аёл 2024 йилда ўзбекистонликларни Россия Қуролли Кучларига ёллаш орқали пул топишни таклиф қилган шахс билан танишган. У Россиянинг Самара шаҳрига бориб, январь ойида Ўзбекистонга қайтиб келган.

Ўзбекистонга қайтгач, Н.У. бир фуқарога СВОда иштирок этгани учун ойига 4000-7000 доллар тўланишини ва бир йилда 40 000 долларгача топиш мумкинлигини ваъда қилган. У бу одамнинг паспорт маълумотларини Россиядаги шеригига юборган. Аёл уни чегара орқали олиб ўтмоқчи бўлганида, Тошкент вилоятидаги "Навоий" божхона постида ДХХ ходимлари томонидан ушланган.

Судда айбига иқрор бўлган Н.У. Жиноят кодексининг 154-моддаси ("Ёлланмачилик") бўйича айбдор деб топилган. Гарчи ушбу жиноят учун 7 йилдан 12 йилгача озодликдан маҳрум қилиш жазоси белгиланган бўлса-да, суд унга енгилроқ жазо тайинлаган.

Ўзбекистонда хитой тили мактаб ва университетларда ўқитилади

Ўзбекистон Президенти Шавкат Мирзиёев мамлакат мактаб ва университетларида хитой тилини ўқитишни жорий этиш режаларини эълон қилди, дея хабар берди хусусий "Gazeta.uz" нашри.

У бу ҳақда ҳукумат йиғилишида сўзлаб, Ўзбекистон ва Хитой ўртасидаги ҳамкорликнинг ўсиб бораётганини таъкидлади.

Президентнинг айтишича, унинг Хитойга яқинда қилган ташрифи чоғида энергия, геология, кимё, транспорт, қишлоқ хўжалиги ва сув хўжалиги каби соҳаларда етакчи Хитой компаниялари билан 35 миллиард долларлик йирик инвестиция лойиҳалари пакети бўйича келишувга эришилган.

"Бу лойиҳаларни амалга ошириш учун Ўзбекистонга технология ва хитой тилини яхши биладиган минглаб мутахассислар керак бўлади. Тилни ўқитиш учун мамлакатимиздаги университетлар, техник коллежлар ва мактабларга 100 дан ортиқ хитойлик тил эгалари ва кўнгиллилар таклиф этилади", — дея президентнинг сўзларидан иқтибос келтирди нашр.

Хабарда айтилишича, ҳукумат, шунингдек, Хитойнинг касбий таълим тажрибасини ўзбекистонлик талабаларга етказиш мақсадида мамлакатнинг ҳар бир вилоятида иккитадан "Ўзбекистон-Хитой устахонаси"ни ташкил этишни режалаштирган.

10 сентябр 2025. Ўзбекистон: Онадан болани ким ҳимоя қилади? "Исроилни лаънатласа" кимга ҳақорат бўлади? Ўринбосарларнинг қонундан хабари йўқми?

Ўзбекистондан олинаётган хабарларга кўра, 2022 йилда Тошкент ҳайвонот боғида кичик ёшдаги қизини айиқ волерига ташлаб юборган аёл бу сафар фарзандини пичоқлаб ўлдирган.

Маълум бўлишича, ҳодиса 10 август куни Тошкентнинг Сергели туманида юз берган. 1991 йилда туғилган аёл ўзини ғалати тутган ва ошхона пичоғи билан 2018 йилда туғилган қизига бир неча марта жароҳат етказган. Натижада қизча олган тан жароҳатлари сабаб воқеа жойида вафот этган.

Маҳалла вакили эса, аёл 2 август куни руҳий-асаб касалликлари шифохонасидан даволаниб чиққани ва унга амбулатор даволаниш буюрилгани ҳақида айтган.

Хабарларда аёлнинг 2-сон шаҳар руҳий-асаб касалликлари диспансерида ҳисобга олингани ҳам тилга олинган.

Англашилишича, маҳалла вакили аёл билан суҳбатлашганда унинг ҳолати яхши эканини айтган.

Сўнгги янгилик ижтимоий тармоқларда ҳам эътиборга тушган.

Постларда "носоғлом руҳиятга эга онага фарзанди қандай қилиб қайтариб берилгани"га оид саволлар ҳам бўй кўрсатган.

Хабарларда айтилишича, Бош прокуратура матбуот котиби Ҳаёт Шамсутдинов мазкур ҳолат юзасидан Жиноят кодексининг 97-моддаси (Қасддан одам ўлдириш) билан жиноят иши қўзғатилганини маълум қилган.

Гумонланувчи аёл ушлангани ва тергов ҳаракатлари давом этаётгани айтилмоқда.

Эслатиб ўтамиз, 2022 йил 28 январь куни Тошкент ҳайвонот боғида мазкур аёл қизини 5 метр баландликдан айиқ қафасига ташлаб юборган эди.

Ўшанда бу ҳолат юзасидан ҳам жиноят иши қўзғатилиб, тергов ҳаракатлари олиб борилган.

Аёлнинг қиздан ташқари яна бир ўғли борлиги айтилади.

Мубашшир Аҳмад иши: "Лаънати Исроил" сўзи халқ ёки давлатни ҳақорат қиладими?

Тошкент шаҳар Жиноят ишлари бўйича Учтепа туман судида Мубашшир Аҳмадга нисбатан суд мажлиси давом этмоқда. Иккинчи суд мажлисида экспертлар гувоҳ сифатида сўроқ қилиниб, уларнинг хулосалари муҳокама қилинди. Бу ҳақда Daryo.uz интернет нашри хабар берди.

Улар "Лаънати Исроил" каби сўзларда халқ ёки давлат ҳақорат қилингани борасида баҳсли фикрларни билдиришди.

Тошкентдаги судда Мубашшир Аҳмад иши бўйича экспертлар "Лаънати Исроил" каби сўзларда миллат ҳақорат қилинганини таъкидлади, аммо кейин бу сўзлар давлатга қаратилганини билдирди.

Судда Дин ишлари бўйича қўмита вакили диний материалларни интернетга жойлашдан олдин рухсат олиш шартлигини айтди. Адвокатлар бу қонунчиликка эътироз билдирганда, экспертлар бу масала юқоридан белгиланганини таъкидлади.

Суд мажлиси 15 сентябрга қолдирилди. Мубашшир Аҳмадга нисбатан миллий адоват қўзғатиш ва диний материалларни ноқонуний тарқатиш каби айбловлар қўйилган.

Сурхондарёда ҳоким ўринбосари пахта теримига мажбурлашда айбланмоқда

Сурхондарё вилоятининг Сариосиё тумани ҳокими ўринбосари Дилфуза Тошматова маҳалла фаолларини пахта теримига мажбурлаётгани ҳақида хабарлар тарқалди.

Kun.uz хабар беришича, уларга келиб тушган аудио ва видеоёзувларда ҳоким ўринбосари фаолларни "виждонсизлар" ва "ноинсофлар" деб атаб, ҳар биридан 5 кишидан одам олиб келишни талаб қилган.

Маълумот учун, Ўзбекистонда мажбурий меҳнатнинг барча шакллари қонунан тақиқланган. Дилфуза Тошматова 2022 йилдан буён Сариосиё тумани ҳокимининг оила ва хотин-қизлар бўйича ўринбосари лавозимида ишлаб келади.

27 август 2025. Ўзбекистон: Визасиз давлатлар яна биттага кўпайди, Кореяга пул билан юборишни ваъда қилган Миграция агентлиги ходимлари ушланди, Президент Жапаров Иссиқкўлдаги чиқиндиларни терган сайёҳга автомобил совға қилди

Ўзбекистон визасиз борди келишни йўлга қўяётган давлатлар сони яна биттага кўпайди. ДХХ одамларни Жанубий Кореяга юбораман, деб пул олаётган Миграция агентлиги ходимларини ушлади. Садир Жапаров Иссиқкўл атрофини чиқиндидан тозалаган сайёҳга автомобил совға қилди.

Ўзбекистон учун виза бекор қилинган давлатлар сони яна биттага ортди

Ўзбекистон ва Иордания визасиз режим ўрнатади. 26 августда Самарқанд шаҳрида бўлиб ўтган музокаралар якунида Ўзбекистон президенти Шавкат Мирзиёев ва Иордания подшоҳи Абдулла II ибн ал-Ҳусайн Шериклик муносабатларини мустаҳкамлаш тўғрисида қўшма баёнот қабул қилди.

Икки давлат виза талабини бекор қилишга келишиб олди. Келишув икки давлат ўртасида бизнес алоқалар ва туризмни ривожлантириши кутилмоқда.

Амалдаги тартибга кўра, Ўзбекистон фуқаролари Иорданияга бориш учун Иордания дипломатик ваколатхонасига мурожаат қилиши ёки "visa on arrival" - яъни Иордания кириб келгач, аэропортдаги чегарада виза олиши мумкин.

Очиқ манбаларда 2018 йилда Иорданияга тахминан 83 000 Ўзбекистон фуқароси келгани айтилади.

Бугунги кунда Ўзбекистон фуқаролари 40 га яқин давлатга визасиз, яна 42 та мамлакатга эса соддалаштирилган тартибда кириш имкониятига эга.

2023-2025 йилларда Хитой, Бирлашган Араб Амирликлари, Таиланд, Омон, Эрон каби 10 га яқин давлат билан визасиз режим жорий этилди. Шунингдек, Саудия Арабистони, Қатар, Ветнам каби бир қатор мамлакатлар Ўзбекистон фуқаролари учун виза тартибини енгиллаштирди.

Жанубий Кореяга ишга жўнатишда пул билан икки Миграция агентлиги ходими қўлга тушди

Ўзбекистон Давлат хавфсизлик хизмати (ДХХ) Миграция агентлиги ходимларига нисбатан жиноят иши қўзғатилганини маълум қилди.

Расмий ахборотга кўра, агентликнинг Наманган вилояти филиали бош мутахассиси хизмат мавқеидан фойдаланиб, фуқароларни Жанубий Кореяга ишга юбориш ваъдаси билан улардан пул олган. У 41 минг АҚШ долларини олган пайтда ашёвий далиллар билан қўлга олинган.

Терговга қадар текширув давомида, у бу ишни агентликнинг марказий аппаратидаги бош мутахассис билан биргаликда амалга оширгани аниқланган. ДХХ маълумотича, иккинчи ходим ҳам 15 минг долларни қабул қилиб олган вақтда жиноят устида ушланган.

Шунингдек, тергов жараёнида улар 2024 йил давомида 80 нафардан ортиқ фуқарони Кореяга юборишни ваъда қилиб, жами 700 минг доллардан ортиқ маблағ тўплагани, аммо фуқароларни амалий ишга жойлаштирмагани маълум бўлди.

Ҳозирда мазкур шахсларга нисбатан Жиноят кодексининг 168-моддаси ("Фирибгарлик") ва 28,211-моддаси ("Пора олиш") билан жиноят иши қўзғатилгани айтилмоқда.

Миграция агентлигининг муносабати

Миграция агентлиги ўз расмий баёнотида айрим ходимлар томонидан қоидабузарликларга йўл қўйилганини тан олди, аммо Кореяга ишга юбориш жараёнида расмий танловлар умуман ўтказилмаганини таъкидлади.

Агентлик маълум қилишича, Президентнинг 2024 йил 17 октябрдаги фармони билан қайта ташкил этилгандан кейин Кореяга E–9 визаси учун ҳеч қандай расмий танлов ўтказилмаган.

"Фуқароларнинг ишончи ва ҳақ-ҳуқуқларини суиистеъмол қилган шахсларнинг ҳаракатлари кескин қораланади", дейилади баёнотда. Шунингдек, Кореяга ишга жўнатиш билан боғлиқ кадрлар, жумладан агентликнинг Сеулдаги ваколатхонасида фаолият юритган барча ходимлар алмаштирилгани қайд этилди.

Президент Жапаров Иссиқкўл атрофини чиқиндилардан тозалаган сайёҳга автомобил совға қилди

Қирғизистон президенти Садир Жапаров Иссиқкўл атрофини кўнгилли равишда чиқиндилардан тозалаган россиялик сайёҳ Андрей Панаев билан учрашиб, унга автомобил совға қилди.

Жапаров Панаев ҳақида интернет орқали билганини ва шахсан миннатдорлик билдиришни муҳим деб топганини айтди. Президентнинг таъкидлашича, "экология ва табиат чегара билмайди, бутун дунё бир ҳаводан нафас олади, шунинг учун ҳар бир инсон табиатни асрашга ўз ҳиссасини қўшиши керак".

Андрей Панаев 2024 йилда сайёҳ сифатида Қирғизистонга келган ва Иссиқкўл соҳилидаги чиқиндиларни мустақил равишда йиғишни бошлаган. У ўз ҳаракати орқали одамларни тозаликка даъват қилишни мақсад қилганини айтди. Кейинчалик Панаев Қирғизистонни ўзининг янги уйи деб атаган.

Президент унинг меҳнатини эътироф этиб, маҳаллий ишлаб чиқарилган автомобил калитларини топширди, дея хабар беради 24.kg сайти. Жапаров: "Бу совғани Қирғиз халқи, кўнгиллилар ва экофаоллар номидан тақдим этаман", – деган.