Ливан Исроил зарбасидан фаластинлик қочқинлар жамлоғи яқинида 13 кишининг ўлганини маълум қилди

Ливан соғлиқни сақлаш вазирлигининг маълум қилишича, жанубий Ливандаги фаластинлик қочқинлар лагери яқинида Исроил ҳужуми оқибатида камида 13 киши ҳалок бўлган.

Исроил ҳарбийлари ҳужум Айн ал-Ҳилван ҳудудида жойлашган ўқув базасида фаолият юритаётган Ҳамас жангариларига қаратилганини айтди.

Уларнинг таъкидлашича, бу жой Ҳамас томонидан Исроилга ҳужумларни режалаштириш ва амалга ошириш учун ишлатилган, бироқ Ҳамас буни "тўқима ва ёлғон" деб рад этди.

Исроил Ливанда мунтазам ҳаво ҳужумларини амалга ошириб келмоқда. Бу ҳужумлар Эрон томонидан қўллаб-қувватланадиган Ҳизбуллоҳ гуруҳи билан можарони тугатиш бўйича келишувдан кейин ҳам давом этмоқда.

Кўпчилик ҳужумлар Ҳизбуллоҳни нишонга олган, аммо Исроил Ливандаги Ҳамасни ҳам урган.

Ҳалок бўлганлардан ташқари, Ливан соғлиқни сақлаш вазирлиги ҳужумда камида тўрт киши яраланганини билдирди.

Тасвирларда Айн ал-Ҳилван лагери киришида фавқулодда хизмат ходимлари кўринади. Интернетда тарқалган видеоларда эса тор кўчалардан тез ёрдам машиналари ўтаётгани, зарба берилган жойдан улкан тутун кўтарилаётгани акс этган.

Дастлабки хабарларга кўра, ҳужум одатда кечқурун гавжум бўладиган масжид ташқарисидаги ҳудудга қаратилган.

Ҳужумни қоралаб, Ҳамас Ливандаги фаластинликлар лагерларида ҳарбий иншоотлари йўқлигини ва нишонга олинган жой очиқ спорт майдони эканини айтди.

Исроил мудофаа кучлари (IDF) баёнотида шундай дейилади: "Ҳужумдан олдин тинч аҳоли зарар кўриш эҳтимолини камайтириш учун аниқ зарбалар, ҳаво кузатувлари ва қўшимча разведка маълумотларидан фойдаланилди."

Ҳамас 2023 йил 7-октябрда Ғазодан жанубий Исроилга ҳужум қилиб, тахминан 1 200 кишини ўлдирган ва 251 кишини гаровга олган эди. Исроилнинг ҳарбий жавоби Ғазoда камида 69 169 фаластинликнинг ўлимига сабаб бўлган (Ҳамас бошқарувидаги соғлиқни сақлаш вазирлиги маълумотига кўра).

Исроил ва Ҳизбуллоҳ ўртасидаги жанглар 7-октябрдан кейинги кун Ҳизбуллоҳ Исроил позицияларига ракета отганидан сўнг кучайган. Ҳизбуллоҳ бу ҳаракатни Ғазодаги фаластинликларга хайрихоҳлик сифатида изоҳлаган.

Исроил ва Ҳизбуллоҳ ўртасида 13 ой кескин можаро давом этди. Бу 2024 йил октябрда Исроилнинг жанубий Ливанга кенг кўламли бомбардимони ва қуруқликдаги ҳужуми билан якунланган эди.

Ливан расмийлари Исроил ҳужумлари натижасида тахминан 4 000 киши, жумладан кўплаб тинч аҳоли ҳалок бўлганини ва 1,2 миллиондан ортиқ одам кўчирилганини айтган эди. Исроил расмийлари эса жангларда 80 дан ортиқ аскар ва 47 тинч фуқаро ҳалок бўлганини билдирган.