Зеленский: Россия музокара ўрнига баллистик ракеталарни танлаяпти

Украина Президенти Володимир Зеленский пойтахт Киевда камида тўрт бола дохил 15 инсон ўлимига, яна ўнлаб тинч фуқаролар ярадор бўлишига олиб келган ҳужумни қораларкан, Россия музокара столи ўрнига баллистик ракетани танлаяпти, деди.

27 августдан 28 августга ўтар кечаси Украинанинг кўплаб ҳудудлари, шу жумладан, пойтахт Киев ҳам Россиянинг дрон ва ракеталари ҳужумларига тутилди.

Расмийларга кўра, Киев шаҳрининг Дарницкий туманидаги уйга берилган зарба оқибатида камида 15 инсон ҳалок бўлди.

Уларнинг тўрт нафари болалар: икки яшар икки бола, 14 ва 17 яшарлар.

38 инсон жароҳатлангани, уйнинг бутун бошли бир қисми вайрон бўлган.

Ҳужум оқибатида Киевдаги Британия Кенгаши ва Европа Комиссиясининг биноларига шикаст етган.

Шунингдек, депода турган "Интерсити" йўловчи поезди ҳам шикастланган.

Россиянинг Мудофаа вазирлиги ўзининг Телеграм каналида тунги зарбалар ҳақида ҳисобот берди, зарбаларда узоқ масофага мўлжалланган товушдан тез "Кинжал" аэробаллистик ракетасидан ҳам фойдаланилганини маълум қилди.

Киев шаҳри ҳокими Виталий Кличко 29 август куни ҳалок бўлганлар хотирасига мотам куни эълон этилишини, барча кўнгилочар тадбирлар бекор қилинишини хабар қилди.

Украина расмийларига кўра, шу тун Россия 629 дрон ва ракета билан ҳужум қилган.

Шундан, 598 таси "Шаҳед" дрони, иккита "Кинжал" аэробаллистик ракетаси, тўққизта "Искандер" ракетаси, 20 та Х-101 қанотли ракета бўлгани хабар қилинди.

"Кинжал"дан бири, "Искандер"дан еттитаси, қанотли ракетадан 18 таси уриб туширилди, деб хабар қилдилар Украина ҳарбийлари.

Украина Президенти Володимир Зеленский Россиянинг сўнгги ҳужумларини "ҳафталар ва ойлардан буён оташкесимга ва реал дипломатияга чақириб келаётган дунёдаги ҳар бир инсонга аниқ жавоб" деб атади.

"Россия музокара столи ўрнига баллистик ракеталарни танлаяпти. У урушни тугатиш ўрнига қотилликларни давом эттиришни танлаяпти. Бу дегани Россия ҳамон оқибатларидан қўрқмайди.

Биз дунёдаги тинчликка чақираётган, лекин ҳозир кўпинча сукут сақлаб турган ҳаммадан принципиал мавқеъ танлашларини кутиб қоламиз. Ва бу Россия қилаётган ҳамма нарса учун янги, янада қаттиқроқ санкциялар вақтидир.

Ҳамма якуний муҳлатлар ўтиб бўлди, ўнлаб дипломатия имкониятлари қўлдан бой берилди. Россия ҳар бир зарбаси учун, урушнинг ҳар бир куни учун жавобгарликни ҳис қилиши лозим", деб ёзди Украина президенти ўзининг Телеграм каналида.

Шу куни Украина Қуролли кучлари Россиянинг Краснодар ўлкаси ва Самара вилоятидаги нефтни қайта ишлаш заводларига дрон ҳужумлари уюштирганини хабар қилди.

Оқибатда Россия расмийлари ёнғинлар келиб чиққани, кейинроқ ўт ўчирилганини маълум қилдилар.

Шунингдек, Украина ҳарбийлари Қрим ярим оролига яқин Азов денгизида "Калибр" ракетаси жойлаштирилган ҳарбий кемасини дрон ҳужумига тутганини хабар қилдилар.

Ҳужум оқибатида кема шикастлангани ва навбатчилик қилиб турган жойидан чекинишга мажбур бўлганини ёзди Украина ҳарбий разведкаси.

27 август. Россия армияси Украинанинг муҳим минтақасига кирди

Пол Кирби, Би-би-си мухбири

Украина Россия армияси Днепропетровскнинг муҳим ҳудудига кирганини тасдиқлади. Бу урушни тўхтатишга қаратилган ҳаракатлар боши берк кўчага кирган паллада рўй бермоқда.

Украина илк бор Россия қўшинлари Днепропетровск вилоятидаги аҳоли пунктларида жанг қилаётганини тасдиқлади.

Москва бу ҳудудни расман ўз ерлари қаторида даъво қилмаган эди.

Агар Россия ҳақиқатан ҳам баъзи қишлоқларни эгаллаган бўлса, бу кичик, аммо рамзий ютуқ ҳисоблади. Кремл учун музокараларда яна бир босим воситасини беради. Бу ҳолат урушни тугатишга қаратилган дипломатик музокаралар тўхтаб қолган бир пайтда юз берди.

"Бу Днепропетровск вилоятида шундай катта кўламли биринчи ҳужум," деди Днепр Тезкор-стратегик гуруҳидан Виктор Трегубов Би-би-сига. Унинг таъкидлашича, Россиянинг илгарилаши тўхтатиб қолинган.

Россия бутун ёз давомида Донецкдан Украина ҳудудига чуқурроқ киришга уринар экан, бу минтақада кирганини даъво қилиб келди.

Июн ойи бошларида Россия расмийлари Днепропетровскда ҳужум бошланганини айтган, аммо Украина хабарларига кўра, улар ҳали ҳудуд чегарасини ҳам деярли бузмаган бўлган.

Россиянинг Днепропетровскка ҳар қандай кўринишда пайдо бўлиши украинларга руҳий зарба бўлиши мумкин. Айниқса, президент Доналд Трампнинг Аляскада Россия раҳбари Владимир Путин билан учрашувига қарамай, АҚШ етакчилигидаги дипломатик уринишлар кучсизланиб бораётган бир манзарада.

Украинадаги DeepState харита лойиҳаси сешанба куни Россия ҳозирда вилоят ичидаги икки қишлоқ – Запорожск ва Новогеоргиевкани эгаллаб олганини кўрсатди.

Бироқ Украина Қуролли кучлари Бош штаби бу маълумотни рад этди. Армия баёнотида айтилишича, "Запорожск ҳали ҳам назоратда" ва "Новогеоргиевка атрофида ҳам фаол жанглар давом этмоқда".

Москва Донецк ва Украина шарқидаги бошқа тўрт вилоятдан фарқли ўлароқ, Днепропетровскка ҳеч қачон даъво қилмаган. Аммо унинг йирик шаҳарларига, жумладан, вилоят маркази Днепрга ҳужум қилган. Чоршанбага ўтар кечада Полтава вилоятидаги энергетика соҳаси ҳам нишонга олинди.

Урушдан олдин Днепропетровск аҳолиси уч миллиондан ортиқ бўлиб, Донбассдан кейин Украинадаги иккинчи йирик саноат маркази ҳисобланган.

Россия армияси катта йўқотишларга қарамай, ҳудудларни эгаллашда секин илгарилаётган бўлса-да, сўнгги кунларда Донецкда айрим ютуқларга эришди.

Август ойи бошларида кичик бир пиёда қисми Украина ҳимоя чизиғидан 10 км ичкарига кириб борган, аммо сўнгги маълумотларга кўра, уларнинг илгарилаши тўхтаб қолган.

Хабарларга кўра, Путин Трампга Украина Донецкда ҳали назоратида сақлаб турган ҳудудларни топширса, урушни тугатишга тайёр эканини айтган. Аммо кўп украиналиклар Россия раҳбарининг бошқа режалари борлигига ишонади.

Киевда Президент маъмурияти раҳбарининг ўринбосари полковник Павло Палица июн ойида АҚШда журналистларга Кремлнинг мақсади Днепр дарёсидан шарққача бўлган бутун Украинани эгаллаш эканини айтган.

Европа Иттифоқи ташқи сиёсати раҳбари Кая Каллас ҳам Украина ҳудудларини Россияга бериб тинчлик келишувига эришиш "тузоқ" бўлишини таъкидлади. "Россия бирор марта ён бермагани ва улар бу ерда тажовузкор эканлигини унутиб қўймоқдамиз," деди у Би-би-сига.

Аляскада Путин билан, кейин эса Вашингтонда Украина президенти Володимир Зеленский билан учрашганидан сўнг, Трамп ўтган ҳафта икки раҳбар ўртасида саммит ташкил этиш бўйича иш бошланганини маълум қилди.

Бироқ ҳафта охирига келиб, бу борада умидлар сўнди.

Россия Ташқи ишлар вазири Сергей Лавров "саммит кун тартиби умуман тайёр эмас" деди ва ҳеч қандай учрашув режалаштирилмаганини билдирди.

У шунингдек, Россия иштирокисиз келгуси хавфсизлик кафолатлари ҳақидаги ҳар қандай муҳокама "беҳуда" эканини айтди. Бу эса Ғарб учун мутлақо қабул қилиб бўлмас ҳолат ҳисобланади.

Сешанба куни кечқурун АҚШ вакили Стив Уиткофф Fox Newsга Ню-Йоркда ҳафта охирида украин расмийлари билан учрашишини ва "руслар билан ҳар куни алоқада эканини" маълум қилди.

Зеленский эса Ғарб ҳамкорларини келишув бўлган тақдирда ҳам келгуси хавфсизлик кафолатларини муҳокама қилишда саъй-ҳаракатларни кучайтиришга чақирди.