Путиннинг "жонли мулоқот"и: Украина, Сурия, иқтисод, мигрантлар ва кўплаб бошқа саволлар

Ўқилиш вақти: 4 дақ

Россия Президенти Владимир Путин анъанавий катта матбуот анжумани билан биргаликда "жонли мулоқот"ини ўтказяпти.

Путин иккинчи йилдирки шу шаклдаги тадбирда қатнашмоқда. Ташкилотчиларнинг айтишича, россияликлар Путинга 2 миллионга яқин саволлар йўллашган.

Ўтган йили президент тўрт соат давомида саволларга жавоб берган. Бу унинг Украинада тўлақонли урушни бошлаганидан бери илк жонли мулоқоти бўлганди.

Бугунги ёйиннинг илк соатида "Гостиний двор" залидаги экранга асосан иқтисодга оид, хусусан нархлар ўсиши ва турар жойларга боғлиқ саволлар чиқарилди. Путиннинг жавобларига кўра,

  • Россия иқтисоди АҚШ ва Евроҳудуддагидан тез ўсяпти
  • Путин нархлар ўсишидан норози ва Марказий Банкни танқид қилди
  • Курск вилоятини озод қилиш санаси ҳозирча ноаниқ, армия жанг қиляпти
  • Путин яна "Орешник" баллистик ракетасини мақтади, унинг айтишича, Ғарб бу ракетага бас келолмайди

Би-би-си мухбири саволи: Сиз Россияни асраб қололдингизми?

Би-би-си мухбири Стив Розенберг 1999 йилда Борис Елциннинг ваколатларини Путинга топшираётиб айтган гапларига ишора тарзида Путин 25 йиллик ҳукмронлиги давомида Россияни асраб қола олган-олмаганлигини сўради. Розенберг Украинага босқин туфайли юз берган Россия йўқотишлари, инфляция ва НАТО кенгайишини санаб ўтди.

"Менимча, мен нафақат асрадим, балки жарлик ёқасидан ортга қайтардим. Бари бизнинг суверенитетимиз буткул йўқолишига етаклаётганди, бусиз Россия мустақил давлат бўлиб қола олмасди", - деди Путин.

Skip Алоқадор мавзулар: and continue readingАлоқадор мавзулар:

End of Алоқадор мавзулар:

Унинг айтишича, Ғарб лидерлари "Елциннинг елкасига уриб" уни қўллаб-қувватлашган, лекин Югославиядаги бомбардимон ортидан чиқиш қилиши биланоқ "уни таҳқирлай бошлашган, алкаш дея калака қилишган". "Мен Россия бировнинг эмас, ўзининг манфаати йўлида қарорлар қиладиган давлат бўлишини учун ҳаммасини қилдим", - деди Путин. У, шунингдек, Россия харидорлик салоҳияти бўйича дунёда биринчи ўринда туришини айтди ва "ўқувчиларингизга буни етказиб қўйинг", деди.

Россия Украина устидан ғалабага яқинми?

ТАСС бош муҳаррири Путиндан "махсус ҳарбий амалиёт"ни қандай баҳолаши ҳақида сўради: "Ғалаба яқинлашдими?" Путинга кўра, Россия жангчилари унга фронтдан турли сувенирлар бериб юбрришяпти ва яқинда 155-денгиз кучлари бригадасининг ҳарбий гербини жўнатишган. Гербни дарров олиб чиқиб Путиннинг ортига ёйишди. "Жангчиларимиз ҳудудларни оляпти... қайтаряпти. Ҳарбий амалиётлар – мураккаб нарса, башорат қилиш қийин. Биз илк мақсадларимиз сари илгарилаяпмиз", - деди Путин.

Skip Энг кўп ўқилган and continue reading
Энг кўп ўқилган

End of Энг кўп ўқилган

Путин муросаага тайёрми?

Америкалик журналист ундан Украина билан муросаага боришга тайёр ё тайёр эмаслиги ҳақида сўради. Путинга кўра, украин тарафи музокаралардан бош тортган. Унинг айтишича, Истанбулда эришилган келишувларни татбиқ қилиш мумкин эди. "Лекин, сизнинг тарафдорингиз Жонсон, яхши соч турмаги билан келди (Британиянинг собиқ бош вазири Борис Жонсонни назарда тутмоқда) ва охирги украин қолгунича курашиш кераклигини айтди. Ана курашишяпти, лекин украинлар тугаб боряпти", - дея жавоб қайтарди Путин.

Россияпараст журналистнинг ўхшаш саволига жавоб бера туриб, Путин Украина Президенти Володимир Зеленскийни легитим президент дея тан олмаслиги, ҳамда Зеленский сайловда қатнашиб сайлансагина, у билан музокара қилишини айтди. (Уруш туфайли 2024 йилда Украинада президентлик сайловларига ўтказилмаган ва Россия матбуотида Зеленскийнинг легитимлиги савол остига олинган.)

Сурия ҳақида

Путиннинг айтишича, ҳали Башар ал-Ассад билан кўришмаган. Россия Ташқи ишлар вазирлигига кўра, Ассад ҳозирда Москвада. Путин Ассадни ағдарган исёнчиларни "қуролли мухолифат" деб атади (улар орасида Россияда террорчи ташкилот дея таснифланган Ҳайят Таҳрир аш-Шам ҳам бор).

Путинга кўра, Ассаднинг тарафдорлари, асосан "Эронпараст бўлинмалар" Ҳалабдан жангсиз чекинганлар. "Бутун Сурия ҳудуди бўйлаб шундай бўлди", - деди у. Путиннинг айтишича, Эрон 4 минг одамни олиб чиққан, уларнинг бир қисми Ливан, яна бир қисми Ироққа олиб чиқилган. "Бугунда вазият оддий эмас. Биз барча гуруҳлар билан алоқаларни ушлаб турибмиз", - деди Россия раҳбари.

Исроил – Суриядаги вазиятдан энг катта манфаатдор

Турк журналистининг "Исроил Сурияни босиб олиши" ҳақидаги саволига жавоб берар экан, Путин унинг Яқин Шақр бўйича мавқеи ўзгаришсиз қолаётгани, ҳамда муаммони фақат Фаластин давлатини барпо этиш билан ечиш мумкинлигини айтди.

"Исроил – Суриядаги вазиятдан энг катта манфаатдор", - деди у. Унга кўра, Россия Сурия ҳудудлари босиб олинишини қоралаши, лекин айни дамда Исроил, мисол учун Туркия каби, ўз давлати хавфсизлиги муаммоларини ечаётганини билдирди.

Путин Марказий Осиёда рус мактабларини очишга чақирди

"Огни Кубани" нашри журналисти меҳнат муҳожирлари ҳақида савол бериб, ҳудудларда ишчилар етишмаётгани ҳақида гапирди. Путин, бир томондан, малакасиз ишчи кучига бўлган эҳтиёжни минималлаштириш, иккинчи томондан, Россияга ишлаш учун келадиган одамларни ўқитиш зарурлигини айтди.

Skip Бизнинг ижтимоий тармоқлар: and continue readingБизнинг ижтимоий тармоқлар:

End of Бизнинг ижтимоий тармоқлар:

Путинга кўра, Марказий Осиё мамлакатларида рус мактаблари ва рус тилини ўргатадиган даргоҳлар тармоқларини очиш, бўлажак муҳожирларни Россия маданияти, қадриятлари ва қонунлари билан яқиндан таништириш зарур.

Унинг айтишича, шу билан бирга, аллақачон мамлакатда бўлган чет элликлар учун талабларни кучайтириш керак. Бу йўналишдаги сиёсатга мисол сифатида Путин мактабларга рус тилини билмайдиган болаларни қабул қилмасликка рухсат берувчи қонунни келтирди. Унинг таъкидлашича, "одамларнинг ҳуқуқлари поймол қилинмаслигига ҳаракат қилишимиз керак, лекин айни дамда тизимга ортиқча юк бўлмасин".