Махфий амалиёт: Моссад ходимлари Ҳизбуллоҳ рация ва пейжерлари қандай портлатиб юборилгани ҳақида гапириб берди

Моссаднинг икки ходими CBS телеканали билан интервьюда Ҳизбуллоҳ жангариларининг рация ва пейжерлари қандай портлатиб юборилганини сўзлаб берди. Маълум бўлишича, Ҳизбуллоҳ аъзолари рацияларни – ичида портловчи модда борлигидан бехабар – 10 йил давомида ишлатиб юрган.

Минглаб пейжерлар 2024 йил 17 сентябрда портлаб кетган бўлсада, CBS суҳбатдошлари сўзларига кўра, рациялар билан боғлиқ махфий амалиёт анча йил аввал бошланган.

Телеканал билан гаплашган Моссад ходимларидан бири Майкл (ҳар икки ходим ҳам қора ниқобда ёритилмаган саҳнада ва овозлари ўзгартирилган ҳолда сохта исмлар остида интервью берган) Исроил разведка хизмати рацияларнинг батареяларига портловчи моддаларни ўрнатиб, уларни Ҳизбуллоҳга сотгани ҳақида гапирган.

Кейинроқ портлаб кетган 16 минг рацияни сотиш учун Моссад сохта компания ташкил қилиб, Ҳизбуллоҳга "жуда яхши нарх таклиф қилган", дейди Майкл.

"Биз чет эл компанияларини шундай тарзда ташкил қила оламизки, уларнинг ортида ким турганини ҳеч ким аниқлай олмайди. Биз сохта компаниялар ортидан яна бошқа сохта компания ташкил этамиз... Биз хаёлий дунёни яратамиз. Биз – глобал киностудиямиз: сценарий ёзамиз, режиссёрлик қиламиз, продюсерлик қиламиз ва бош ролларни ижро этамиз. Бутун дунё – биз учун саҳна", сўзлайди Майкл интервью давомида.

Интервьюдан маълум бўлишича, "Ҳизбуллоҳ" жангарилари рацияларни фақат жанг шароитида ишлатгани сабабли, уларни бир вақтнинг ўзида портлатиб юборишнинг имкони йўқ бўлган.

Шу сабабли, Моссад ўзига ашаддий душман гуруҳга портловчи моддалар билан тўлдирилган пейжерларни ҳам сотишга қарор қилган.

Габриэл номи билан таништирилган иккинчи ходим пейжерлар билан боғлиқ амалиёт 2022 йилда бошланганини маълум қилган.

Пейжерларга портловчи моддаларни жойлаштириш учун улар Тайваннинг Gold Apollo компанияси ишлаб чиқарган моделни оғирроқ ва каттароқ қилиб ўзгартиришга мажбур бўлишган.

"Мен ушбу пейжернинг биз ўзгартириш киритган шаклини директоримизга кўрсатганим кунни эсдан чиқармайман. Ҳеч ким бундай қўпол қурилмани сотиб олмайди, чўнтакда ҳам олиб юриб бўлмайди, деб қаттиқ ғазабланган эди", эслайди Габриэл.

Габриэл икки ҳафтага чўзилган уринишлардан сўнг охир-оқибат директорни "қўпол, аммо иш бера оладиган" пейжерлардан фойдаланишга кўндирганини айтади.

Исроилликлар пейжерлардаги портловчи модда миқдорини шундай ҳисобланганки, у портлаганда фақат жангарининг ўзига зарар етиши, унинг яқинида бўлган одамларга зиён бўлмаслиги имкон қадар таъминланган.

Бу учун улар манекенлар билан кўп бор синовлар ўтказган.

"Террорчи тугмани босганда, фақат ўзи жароҳат олишини таъминлаганмиз. Ёнидаги ҳеч кимга зиён етмайди. Биз ҳаммасини икки марта, уч марта – кўп марта қайта текширганмиз", сўзлайди Габриэл.

Моссад ходимлари, шунингдек, кўп бор синовлардан ўтказиб, шундай рингтонларни танлашганки, портлаш олдидан янграган товуш пейжер эгасини сўнгги келган хабарни очиб ўқишга ундаган.

Бундан ташқари шахс пейжерга келган хабарни очиб ўқиши учун ўртача қанча вақт кетиши ҳам усталик билан ҳисоб-китоб қилинган – Моссаднинг аниқлик киритишича, бунга одатда етти сония вақт сарфланади.

"Трумен шоуси"

Шундан сўнг Моссад сохта компания орқали катта реклама кампанияси уюштириб, Ҳизбуллоҳга янги пейжерларни таклиф қилган.

"Реклама"да айни бу модель бошқалардан кўра каттароқ ва қўполроқ бўлишига қарамай, у анчайин мустаҳкам экани ҳамда сув ва чангдан қўрқмаслигига Ҳизбуллоҳ жангарилари ишонтирилган.

Габриэлнинг айтишича, реклама кампанияси шу даражада муваффақиятли чиққанидан, Ҳизбуллоҳдан ташқари яна кўплаб харидорлардан буюртмалар тушган.

"Албатта биз бошқаларга ҳеч нарса сотмадик. Қиммат нарх билан уларни ҳуркитиб юбордик", дейди Габриэл.

Пейжерларни айнан Ҳизбуллоҳга сотиш учун Моссад Венгрияда яна бир сохта компания ташкил қилган.

Улар Ҳизбуллоҳ аввал ишлаган Gold Apollo компаниясидан сотув менежерини ёллашган.

Бу менежер Ҳизбуллоҳга янги пейджерлардан иборат биринчи партияни реклама сифатида текинга тақдим қилган.

"Ҳаммаси "Трумэн шоуси" фильмидагидек кечди. Биз жараённи парда ортидан назорат қилиб турдик. Ҳизбуллоҳ учун учун ҳаммаси ҳалол бўлиб кўринди: бизнесменлар, маркетинг, муҳандислар, шоурум", мақтанади Габриэль.

Пейжерларни биринчи қўл ишлаб чиқарган Gold Apollo фирмаси, табиийки, ўз маҳсулотларини Моссадга сотаётганидан бехабар бўлган.

Махфий амалиёт натижалари

2024 йил сентябрига келиб, Ҳизбуллоҳ 5000 та "мустаҳкам ва сувга чидамли", аслида эса бир неча грамм портловчи модда ўрнатилган пейжерларни қўлга киритган.

17 сентябр куни эса Моссад пейжерларга хабар юборган: "Шифрланган хабар қабул қилинди".

Экранда кўринган бу хабарни очиш учун икки тугмани бир вақтнинг ўзида босиш, янада аниқроғи – пейжерни икки қўлда тутиб, танага яқинроқ олиб келиш лозим бўлган.

Габриэл тугмалар босилмаган тақдирда ҳам, пейжерлар барибир портлаб кетган бўлиши, хабар шунчаки жангариларни қурилмани қўлга олишга ундаш йўлида керак бўлгани ҳақида сўзлайди.

"Мақсадимиз жангариларни ўлдириш эмас, балки уларни жароҳатлаш бўлган", тушунтиради у.

"Агар жангари ўлса, у шунчаки мурдага айланади. Аммо агар у тан жароҳати олса, уни даволаш ҳамда бунга пул, куч, ресурслар сарфлашга тўғри келади. Бундан ташқари қўли, кўзидан айрилган бу шахслар Ливанда ўзига хос тимсолга ҳам айланади. Улар биз Яқин Шарқда ҳаммадан қудратли эканимизнинг тирик далилидир".

Амалиёт кескин танқидларга сабаб бўлган – Исроилга қарши фаоллар пейжерлар, эртаси куни эса рацияларнинг портлаб кетиши натижасида нафақат минглаб Ҳизбуллоҳ жангарилари, балки бир қатор тинч аҳоли вакиллари ҳам зарар кўрганини таъкидлаб чиққан.

БМТнинг инсон ҳуқуқлари бўйича олий комиссари бу амалиётни халқаро қонунчиликни бузиш, деб баҳолаган.

"Исроил учун ўзининг жаҳондаги обрў-эътибори наҳотки муҳим эмас?", дея сўраган CBS бошловчиси Моссад ходимларидан.

"Албатта муҳим. Аммо гап устивор масалалар ҳақида кетганда, халқимизни муҳофаза қилиш биз учун биринчи ўринда туради", деган Габриэл бу саволга жавобан.