АҚШ ўта муҳим минералларга бой Ўзбекистонга кириб келмоқдами? Ўзбекистон олтин захирасини бойитмоқда

Geopoliticalmonitor.com нашрининг ёзишича, АҚШ Марказий Осиёнинг ўта муҳим минералларга бой давлати Ўзбекистон билан ҳамкорлик қилиш борасида маълум натижаларга эришган.

Нашрга кўра, 2024 йил Вашингтон ва Тошкент ўртасида бу борада бир қанча олий даражадаги учрашувлар ва келишувлар бўлиб ўтди. Улар муҳокамага лойиқ, дейилади унда.

АҚШнинг Ўзбекистондаги элчиси Жонатан Хеник ва Ўзбекистон Тоғ-кон саноати ва геология вазирининг биринчи ўринбосари Омонулло Насритдинходжаев ўтган йилнинг 16 сентябр куни АҚШ ва Ўзбекистоннинг минерал ресурсларни етказиб бериш бўйича глобал занжирларни диверсификация қилиш ва тоза энергияга ўтиш жараёнини илгари суриш мақсадида "ўзаро англашув меморандуми"ни имзоладилар. У Марказий Осиёнинг ноёб экотизимларини ҳимоя қилишни ҳам назарда тутади.

Ўзбекистон Кон саноати ва геология вазирлиги ушбу учрашувни юқори баҳолаб, АҚШ – Ўзбекистон мулоқотининг давом этишида, "қидирув, кончилик ва юқори қийматли маҳсулотлар занжирини ривожлантириш" йўлида "муҳим қадам" эканини қайд қилди.

Икки ой ўтгач, ноябрда Вашингтон ва Тошкент Стратегик ҳамкорлик бўйича мулоқот ўтказди. Унда ўта муҳим минераллар муҳокама марказида бўлди.

АҚШ Давлат департаменти маълумотларига кўра, томонлар "ўта муҳим минералларни қазиб олиш ва Ўзбекистоннинг табиий газ инфратузилмасини модернизация қилиш каби ҳамкорликнинг янги йўналишларини нишонлашди".

Нашр бундан ташқари АҚШнинг ўта муҳим минераллар бўйича Марказий Осиёнинг 5 давлати ва АҚШ бошчилигида ўтган йилнинг феврал ойида бўлиб ўтган Мулоқотга эътибор қаратган.

Ўзбекистондаги ушбу табиий бойликларга фақат АҚШ қизиқиш билдирмаяпти. Американинг мулоқотидан икки ой ўтиб Тошкентга Европа Иттифоқи вакиллари келишган ва ўта муҳим минераллар бўйича стратегик ҳамкорлик меморандумини имзолаган.

Мақолада Ўзбекистон аллақачон нефт ва газ конлари билан машҳурлиги айтилади.

"Шу билан бирга, мамлакатда ўта муҳим минераллар ва камёб ер элементлари, жумладан германий ва кремнийнинг катта захираси мавжуд. Мамлакат, шунингдек, уран, рений ва теллур қазиб олиш бўйича дунёдаги етакчи ўнталикка киради; мис заҳиралари бўйича дунёнинг 15 давлатидан бири; ва молибден ва кадмий заҳиралари бўйича дунёдаги энг яхши 20 таликка киради", деб ёзади нашр.

АҚШ Геологик хизмати томонидан 2018 йил чиқарилган ҳисоботда Ўзбекистондаги ноёб ер элементлари ва ўта муҳим минералларга бой 87 та объект келтирилган.

Ўзбекистон геология саноати 2023 йилда қарийб 11 миллиард долларни ташкил қилган.

Президент Шавкат Мирзиёев "муҳим хомашё конларини ўзлаштириш ва янгиларини қидиришни кенгайтириш зарурлиги"ни таъкидлаган.

Ўзбекистон энг кўп олтин сотиб олган иккинчи давлат

Ўта муҳим минераллар бўйича захираларга сармоя киритишда Ғарб билан ҳамкорлик қилаётган Ўзбекистон ноябр ойида энг кўп олтин сотиб олган иккинчи давлат бўлган.

Жаҳон олтин кенгаши маълумотларига кўра, Ўзбекистон Марказий банки ноябр ойида олтин заҳираларини сезиларли даражада оширган. Мамлакат 2024 йил июлидан кейин илк бор олтин харид қилган.

Ноябр ойида дунёнинг марказий банклари 53 тонна соф олтин харид қилишди.

2024 йил давомида кузатилган кучли харид тенденцияси давом этган.

Олтин сотиб олувчилар рўйхатида Полша Миллий банки етакчилик қилган.

У ўз заҳираларига 21 тонна олтин қўшиб, жами 448 тоннага етказган.

Ўзбекистон Марказий банки ноябрь ойида 9 тонна олтин сотиб олиб, жаҳон миқёсида иккинчи ўринни эгаллади. Ёздан бери Ўзбекистон олтин заҳиралари биринчи марта ўсган ва йиллик 11 тонна соф олтин сотиб олган.

Ноябр ойи ҳолатига кўра, Ўзбекистоннинг умумий олтин захираси 382 тоннани ташкил этди.