Қамчибек Ташиев Қирғизистондан чиқиб кетди
Сурат манбаси, Official
- Author, Би-би-си янгиликлар бўлими
- Ўқилиш вақти: 2 дақ
Қирғизистон Миллий хавфсизлик давлат қўмитасининг (МХДҚ) собиқ раиси Қамчибек Ташиев чет элга чиқиб кетди. Бу ҳақда 17 февралда унинг тарафдори, журналист Ўткурбек Рахманов маълум қилиб, ижтимоий тармоқларда видео эълон қилди. Видеода Қамчибек Ташиевнинг одамлар билан хайрлашаётганини кўриш мумкин.
МХДҚ собиқ раиси, мамлакатдаги "иккинчи одам" деб аталиб келган Қамчибек Ташиев чет элга қандай мақсадда кетгани номаълум. Бу борада унинг тарафдорлари ёки яқинлари ҳозирча маълумот беришмади.
Президент Садир Жапаров 16 феврал куни мамлакатдаги сўнгги сиёсий воқеалар ва Қамчибек Ташиев билан муносабатлари ҳақида "Кабар" миллий ахборот агентлигига интервью берган эди. Унда давлат раҳбари Ташиев билан дўст бўлиб қолишини, бироқ у ҳеч қандай давлат лавозимига келмаслигини айтган.
End of Ижтимоий тармоқлардаги саҳифаларимиз
10 февралда Қирғизистон президенти Садир Жапаров Қамчибек Ташиевни Вазирлар Маҳкамаси раисининг ўринбосари — Миллий хавфсизлик давлат қўмитаси раиси лавозимидан бўшатган эди. Ўша куни Германияда бўлган Ташиев бу қарор у учун кутилмаган бўлганини билдирган. Жапаров эса қарор қабул қилишдан олдин дўстига телефон қилганини айтган.
Ha, uchrashdik. Kecha kechqurun qabul qildim. Dam ol, do'stim, sog'lig'ingga qara, tinch yur, dedim.
Бундан олдин Қамчибек Ташиевнинг тарафдорлари у матбуот анжумани ўтказишини билдиришган эди. Бироқ Ташиев шу кунларда журналистлар билан учрашмади.
Садир Жапаров 16 февралдаги интервьюсида Қамчибек Ташиев билан учрашганини ва у давлат хизматига қайтмаслигини таъкидлади:
"Ҳа, учрашдик. Кеча кечқурун қабул қилдим. "Дам ол дўстим, соғлиғингга қара, тинч юр", дедим. Дўстимнинг айтишича, у "оқсоқоллар" деймизми, "кўксақоллар" деймизми, ҳеч ким билан гаплашмаган экан. Шундан келиб чиқиб хулоса қилдимки, анавилар дўстимга билдирмасдан, ўзларича махфий режа билан иш олиб боришган. Руслар айтганидек, унга "айиқ хизматини" (медвежья услуга) кўрсатишди", — деди Садир Жапаров.
Шу куннинг ўзида Ташиевнинг укаси Шаирбек Ташиев "Азаттиқ"қа интервью бериб, Германиядан қайтган акаси билан учрашганини, соғлиғини тиклаш учун вақт кераклигини ва президентнинг қарори уларнинг оиласида ҳеч қандай норозилик (резонанс) уйғотмаганини таъкидлади. Бундан аввал депутат Шаирбек Ташиевнинг ҳам Қирғизистондан чиқиб кетгани ҳақида миш-мишлар тарқалган эди:
"Соғлиғини тиклаш учун яна вақт керак. Президент қабул қилган қарорларга келсак, барча ходимлар ва фуқаролар президент қарорини бажариши шарт. Бу президентнинг қарори ва қонуний ҳолат. Биз уни тўғри ёки нотўғри деб таҳлил қилишдан йироқмиз. Бу қарор оиламизда ҳеч қандай резонанс келтириб чиқармади".
57 ёшли Қамчибек Ташиев Садир Жапаровнинг дўсти ва сиёсатдаги тандемдоши сифатида давлатни бошқариш ҳамда қарорлар қабул қилиш жараёнларида бевосита иштирок этиб келган эди.
