Мирзиёев Покистондан қайтаркан, Исломободдаги масжидни портлатганлар ушландими? Зеленский янги баёнот билан чиқди, Путин ҳозирча жим ва россиялик генерал ҳушига келди
Сурат манбаси, Getty Images
Гумондорлар ушландими?
Сурат манбаси, rasmiy
Покистон Ички ишлар вазири янги баёнот билан чиқди.
Вазир жума кунги худкушлик ҳужумига ёрдам берганликда гумонланиб, тўрт киши ҳибсга олинганини билдирди.
Ҳужум Ўзбекистон президенти ўзининг Исломободга давлат ташрифини якунлагани расман хабар берилган бир кунга тўғри келган, 6 февралда амалга оширилган.
Унда шиаларнинг намозхонлар билан тўла масжиди нишонга олинган.
Ҳужум 31 кишининг умрига зомин бўлган, 160 дан ортиғини яралаган.
Бу Покистон пойтахти сўнгги ўн йилликда гувоҳ бўлган энг ҳалокатли ҳужум бўлгани айтилган.
Шавкат Мирзиёев худди ўша куннинг ўзида юз берган ҳодиса муносабати билан Покистон президенти ва Бош вазирига расман таъзия йўллаган.
Расмий хабарларга кўра, Ўзбекистон раҳбари ўзининг таъзиясида Покистон халқи, марҳумларнинг оила аъзолари ва яқинларига ҳамдардлик билдирган.
"Жароҳатланганларнинг тез фурсатда соғайиб кетишини тилаган".
Худкушлик ҳужумига масъулиятни ИШИД гуруҳи ўз зиммасига олиб чиққан.
Гуруҳнинг Жанубий Осиёдаги Хуросон тармоғига дастлаб айнан Покистонда асос солинган.
БМТнинг яқинда эълон қилинган халқаро ҳисоботида ўз сафларига Марказий Осиёдан янги аъзолар ёллашдаш давом этаётганлиги айтилиб, худди шу тармоқнинг номи тилга олинган.
Покистон Ички ишлар вазири қўлга олинганлар орасида ҳужум ташкилотчиси сифатида кўрилаётган шахснинг ҳам борлигини таъкидлаган, унинг Афғонистон фуқароси эканлигини таъкидлаган.
Унинг айни мазмундаги иддаосига Афғонистондаги Толибон ҳукуматининг муносабати ҳозирча маълум эмас.
Бундан аввал Покистон Мудофаа вазири ҳам Исломободдаги ҳужумда Афғонистоннинг иштироки борлиги ҳақида оғиз очган.
Ўшанда Толибон ҳукумати "ишончли далиллар келтирмай" қилинганини айтиб, вазирнинг даъвосини "афсусланарли", деб атаган.
Аммо сўнгги ҳужум ҳам бу икки қўшни давлат ўртасидаги танглик ҳануз юмшамаган, бунинг иқтисодий таъсири Марказий Осиёни ҳам четлаб ўтмаслигидан хавотирлар кучайиб бораётган бир пайтга тўғри келган.
Покистон Ички ишлар вазирининг маълум қилишича, тўрт гумондорни ушлаш учун олиб борилган рейдлар чоғида ўз сафларидан йўқотишлар бўлган.
Террорга қарши кураш бўлимининг бир зобити ўлдирилган, уч нафари тан жароҳати олган.
Шиа мусулмонлари ИШИД ва Хуросон қанотининг азалий ва доимий нишонларидан бири бўлиб келади.
Энди Исломободда Тошкент кўчаси ва Бобур боғи бўлади - видеони кўриш учун илова қилинган линкни босинг:
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Украина уруши июнгача тугайдими?
Сурат манбаси, Sefa Karacan/Anadolu Agency via Getty Images
Украина президенти ҳам янги баёнот билан чиқди.
Володимир Зеленский айтишича, АҚШ Украина урушини июн ойигача тугатмоқчи.
Урушаётган икки томонни келаси ҳафта Американинг ўзида музокаралар олиб боришга чорламоқчи.
Сўнгги Украина уруши тарихида эса бунақаси бўлмаган.
Украина президентининг маълум қилишича, Америка Қўшма Штатларининг бу таклифига розилик билдиришган.
"Америка илк бор икки томон – Украина ва Россия - музокарачилар ҳайъатига АҚШда бир ҳафта ичида, эҳтимол, Майамида учрашишни таклиф қилди. Биз ўз иштирокимизни тасдиқладик", - деб айтган Володимир Зеленский.
Расмий Вашингтон ва Москва эса ҳозирча жим, бироқ АҚШ президенти Доналд Трамп ўзи қудратга қайтган сўнгги бир йил ичида худди шу урушни тўхтатиш ҳаракатида.
Жума куни Абу Дабида АҚШ воситачилигидаги тинчлик музокараларининг иккинчи босқичи ўзининг ниҳоясига етган, аммо унда ҳам бирор бир жиддийроқ келишувга эришилмаган.
Украина президентининг айтишича, "мураккаб масалалар мураккаблигича қолмоқда" ва бу ҳудудий ён беришларни ҳам кўзда тутади.
Россия Украинага очган урушга тўрт йил бўлди, дипломатик сайъ-ҳаракатлар ҳануз иш бермаётган ва давом этаётган бир паллада ўзаро ҳужумлар ҳам ҳануз тинмаётир.
Жорий пайтда Россия ўзининг эътиборини Украинанинг энергетика инфратузилмаларига қаратган, устма-уст зарбаларини кучайтирган.
АҚШ президентининг Украина урушини "бир кунда тугатиш" ваъдаси ҳали-ҳануз амалда ўзининг ижросини топмаган.
AQSH ilk bor ikki tomon – Ukraina va Rossiya - muzokarachilar hay’atiga AQSHda bir hafta ichida, ehtimol, Mayamida uchrashishni taklif qildi. Biz o‘z ishtirokimizni tasdiqladik...
Россиялик генерал ҳушига келдими?
Сурат манбаси, ROSSIYA MUDOFAA VAZIRLIGI
Россиядан олинаётган хабарларга кўра, генерал Владимир Алексеев ҳушига келган.
Генерал жума куни Москва чеккасида ҳужумга учраган, унга бир неча бор ўқ узилган.
Ўшанда унинг оғир аҳволда зудлик билан касалхонага олиб кетилгани айтилган.
Сўнгги хабарларга кўра, генерал жарроҳлик амалиётини яхши ўтказган.
Тўппончадан отиб кетилган пайтда генерал Алексеев Россия Қуролли кучлари Бош штаби Бош бошқармаси бошлиғининг биринчи муовини лавозимида бўлган.
Россия бу генералига ҳужумда ҳам Украинани айблаган.
Аммо Украина Ташқи ишлар вазирлиги расмий Киевнинг бу иддаосини рад этган, бу ҳодисада ўзларининг бирор бир иштироклари йўқлигини айтган.
Хабар қилинишича, икки гумонланувчи қўлга олинган ва улар тез орада сўроқ қилинади.
Аммо айни мазмундаги хабарларда уларнинг қай бир давлат фуқароси эканликлари очиқланмаган, шахсий маълумотлари ноаён қолган.
"Коммерсантъ"нинг ёзишича, икковлоннинг дастлабки маҳкама тинглови бугун, якшанба кунига режаланган.
Россия томони жума куни юз берган ҳодиса юзасидан одам ўлдиришга уриниш бўйича жиноий иш очган.
2024 йил январида эса ўзбекистонлик Аҳмаджон Қурбонов россиялик бошқа бир генерал - Игор Кирилловни ўлдиришда айбдор, деб топилган ва қамоқ жазосига ҳукм қилинган.
