Россия: Москвада яна бир генерал отиб кетилди
Сурат манбаси, Rossiya mudofaa vazirligi
- Author, Би-би-си янгиликлар бўлими
- Ўқилиш вақти: 1 дақ
Россия армиясининг нуфузли генерали Москвада отиб кетилди ва жароҳат олди.
Генерал-лейтенант Владимир Алексеев пойтахтнинг шимоли-ғарбидаги Волоколамское шосседа юз берган ҳужум ортидан зудлик билан касалхонага олиб кетилган. Унинг аҳволи ҳозирча номаълум.
"Жабрланувчи шаҳар касалхоналаридан бирига ётқизилди", - деди Россия Тергов қўмитаси вакили Светлана Петренко. Қотиллик ҳаракати бўйича жиноий иш очилган.
Алексеев - Россия ҳарбий штабининг бош бошқармасидаги юқори даражали шахс.
У Украина урушида муҳим рол ўйнаган ва Россия 2022 йилда Мариуполни ишғол қилганида музокараларда қатнашган.
2018 йилда ГРУ Британиянинг Солсбери шаҳридаги новичок ҳужумига алоқадорликда айблангач, Алексеев Европа Иттифоқининг санкциясига тушганди.
У, шунингдек, 2023 йилда «Вагнер» жангарилар гуруҳининг раҳбари Евгений Пригожин Россия армиясига қарши юриш қилганида, «Вагнер»нинг кураторларидан бири деб аталганди.
Юриш ортидан у Пригожин билан келишиш учун йўлланган.
Россия матбуоти терговчиларга таяниб ёзишича, Алексеевга турар жойда тўппончадан ўт очилган.
Ўт очган эркак ҳозирда қидирилмоқда.
End of Ижтимоий тармоқлардаги саҳифаларимиз
Ҳозирча ҳужум ортида ким тургани номаълум. Ўтмишда Украина Россиянинг юқори рутбали зобитларига қарши баъзи ҳужумлар учун масъулиятни олган.
Россия жосуслик кучлари ўтган ой охирида Санкт-Петербургда рус аскарини ўлдириш ҳаракатини тўхтатиб қолишганини айтишган.
Алексеев қарийб тўрт йил аввал Россия Украинага қарши кенг-кўламли урушни бошлаганидан бери нишонга олинган яна бир юқори рутбали зобит бўлмоқда.
2025 йил апрелида Россия Қуролли кучларининг бош штаби генерал-лейтенанти Ярослав Москалик ўлдириб кетилганди.
Ўзбекистоннинг Ангрен шаҳрида туғилган Москвалик ўз уйи ташқарисидаги автомобилининг портлаши оқибатида ўлган.
Ўтган йил ноябрида Россия суди Игнат Кузинни умрбод қамоқ жазосига ҳукм қилди.
2024 йил январида эса ўзбекистонлик Аҳмаджон Қурбонов яна бир генерал, Игор Кирилловнинг ўлими учун қамоқ жазосига ҳукм қилинди.
Россиянинг ядровий, биологик ва кимёвий мудофаа қўшинлари раҳбари бўлган Кириллов Москвадаги турар жойи ташқарисида юз берган портлашда ўлганди.
