Сурия: "Ўзбеклар ҳибси" ортида нима бор? ИШИД тарафдорлари нега қувонмоқда? - Видео
Сурат манбаси, Facebook
Суриянинг Идлиб вилоятида ҳукумат кучлари ва Марказий Осиёлик жангарилар ўртасида юз бергани айтилган воқеалар ижтимоий тармоқларда кескин баҳсларга сабаб бўлди.
5 май куни тарқалган хабарлардан сўнг IS тарафдорлари бу воқеадан мамнунлигини яширмади. Айрим исломчи аккаунтлар эса Сурия ҳукуматини хорижий жангариларга қарши куч ишлатишда айблади.
Ҳозирча воқеаларнинг тафсилотлари ноаниқлигича қолмоқда. Ҳукумат тарафдори бўлмиш манбалар вазиятни аҳамиятсизлаштиришга уринмоқда, бошқа аккаунтлар эса хорижий жангарилар, жумладан ўзбекларга қарши "оммавий ҳибслар" бўлганини иддао қилмоқда.
Нима содир бўлди?
Таранглик Идлиб вилоятида бир ўзбек жангариси ҳибсга олинганидан кейин бошлангани айтилмоқда. Бу ҳодиса 2 май куни ўзбек жамоалари норозилигига сабаб бўлган.
Кейинчалик "Суриядаги ўзбек муҳожирлари" номидан чиқиш қилган янги Telegram канали Сурия ҳукумати 5 май куни Идлиб бўйлаб хорижий жангариларга қарши "ҳибс кампанияси" бошлаганини даъво қилди.
5 май куни яратилган @OzbekMuhojir каналига кўра, операция Кафрия, Кафр Жалис, Ҳарим, Идлиб ва ал-Фуъа ҳудудларини қамраб олган. Канал айрим жойларда қуролли тўқнашувлар бўлганини кўрсатувчи видеоларни ҳам тарқатди.
Бироқ ҳукумат тарафдори Telegram саҳифалари бу воқеаларни рад этиб, фақат "қидирувдаги шахслар" ушланганини билдирди. Улар ҳукуматга қарши кучларни "фитна" тарқатишда айблади.
Ҳукумат тарафдори Syria TV телеканали ҳам Кафрия ва ал-Фуъа атрофида "хавфсизлик амалиёти" бўлганини тасдиқлади. Телеканал хабарларига кўра, нишонга олинганларнинг "кўпчилиги ўзбек фуқаролари" бўлган.
Хабарда яна бир тожикистонлик шахс ҳибс вақтида "ҳужумга учрагани" айтилди.
ИШИД тарафдорлари нима демоқда?
Сурат манбаси, Alamy
Араб тилли ИШИД тарафдорлари бу воқеаларни очиқчасига мазах билан қарши олди.
Facebook'даги бир қатор машҳур аккаунтлар хорижий жангарилар ўз вақтида ИШИД га қўшилмагани учун бугунги аҳволга тушганини айтди.
"Бугун улар ўзлари эккан нарсани ўрмоқда", — деб ёзди ИШИД тарафдори ҳисобланган Al-Battar al-Janubi.
Яна бир аккаунт — Amjad al-Hashimi — ИШИДнинг собиқ матбуот котиби Абу Муҳаммад ал-Аднаний ўн йил аввалёқ "ал-Жўлоний уларни ейиши" ҳақида огоҳлантирганини ёзди.
Айрим ИШИД тарафдорлари ҳатто бу воқеаларни хорижий жангарилар учун "сўнгги имконият" деб атаб, уларни ИШИД сафига ўтишга чақирди.
Русийзабон ИШИД тарафдорлари бошқача ёндашмоқда
Telegram'даги рус тилли ИШИД тарафдори бўлмиш каналлар эса нисбатан бошқача позицияни эгаллади.
Age of War ва Malhama Events каби каналлар асосан ўзбек муҳожирларига қарши эҳтимолий зўравонликлар ҳақида хабар тарқатди.
Улар Сурия хавфсизлик кучлари ўзбекларни калтаклагани ҳақидаги иддаоларни, шунингдек жабрланганлар гувоҳликларини эълон қилди.
Бу каби каналлар аввал ҳам Сурия ҳукумати Марказий Осиёлик муҳожирларга нисбатан зўравонлик қилгани ҳақидаги даъволарни тарқатиб келган.
End of Ижтимоий тармоқлардаги саҳифаларимиз:
Age of War канали Дамашқ ҳибслар сабабини тушунтирмаётганини айтди ва бу ҳаракат "Шараанинг хорижий ҳамкорлари" талаби билан амалга оширилган бўлиши мумкинлигини тахмин қилди.
Айрим хабарларда "Туркистон"дан келган муҳожирлар ҳам нишонга олинаётгани ҳақида хавотирлар билдирилди. ИШИД тарафдорлари бу атама билан одатда уйғурларга ишора қилади.
Malhama Events тарқатган видеода бир ўзбек жангариси вазият "кенг кўламли уруш"га айланиши мумкинлигини айтган.
Диндорлар ўртасида ҳам якдиллик йўқ
Сурия мавзусида ёзадиган кескин қарашдаги диндор аккаунтлар ҳам бир хил позицияни эгалламади.
Айримлари Сурия ҳукуматини хорижий жангарилардан "юз ўгирганликда" айблади. Улар бу жангариларнинг Башар Асадга қарши урушда муҳим роль ўйнаганини таъкидлади.
Telegram'даги Jihad Ahl al-Sham аккаунти:
"Муҳожирларни яхши кўриш — иймон белгиси, улардан нафратланиш эса нифоқ белгиси", — деб ёзди.
Бу аккаунт Дамашқ ҳукумати халқаро жамоатчиликни рози қилиш учун "жаҳон жиҳод ҳаракати"ни парчалашга ёрдам бераётганини ҳам айтди.
Бошқа айрим қатъий диний қарашдаги гуруҳлар эса эса вазминликка чақирди.
Abu Yahya al-Shami тарафдорларига "сўзларни эҳтиёт қилиб танлаш" ва ИШИД тарафдорлари вазиятдан фойдаланишига йўл қўймасликни тавсия қилди.
Al-Suri al-Muhajir эса интернетда тарқалаётган ҳар қандай маълумотга ишонмасликка чақириб, фақат Марказий Осиёлик жангарилар раҳбариятидан чиққан маълумотларга ишониш кераклигини айтди.
"Муҳожирундан келмаган ҳеч қандай маълумотни тарқатмаслигимиз керак", — деб ёзди у.
