برطانیہ کو یورپی یونین سے منہ نہیں موڑنا چاہیے: کیمرون
،تصویر کا ذریعہReuters
برطانیہ کے وزیراعظم ڈیوڈ کیمرون کا کہنا ہے کہ یورپی یونین سے علیحدگی کے بعد بھی برطانیہ کو ’یورپی یونین سے منہ نہیں موڑنا چاہیے‘۔
برطانیہ کے یورپی یونین سے الگ ہو جانے کے فیصلے کے بعد یورپی اتحاد میں شامل رہنما برسلز میں دوسرے دن بھی ملاقات کر رہے ہیں تاہم اس اجلاس میں برطانیہ شامل نہیں ہو گا۔
یورپی اتحاد کی 40 سالہ تاریخ میں ایسا پہلی بار ہو گا جب برطانیہ اس اجلاس میں شرکت نہیں کرے گا۔
برطانوی وزیرِاعظم ڈیوڈ کیمرون یورپی اتحاد میں شامل 27 دیگر ارکان برطانیہ کے یورپی یونین سے الگ ہو جانے کے فیصلے کے حوالے سے ہونے والے اجلاس میں شرکت نہیں کریں گے۔
برطانیہ کے یورپی اتحاد سے علیحدگی کے فیصلے کے بعد ڈیوڈ کیمرون نے یورپی یونین کے رہنماؤں سے برسلز میں ہونے والی ملاقات کے بعد کہا کہ یورپی اتحاد کے ساتھ مستقبل میں تجارت اور سکیورٹی جیسے معاملات اہم رہیں گے۔
تاہم ان کا کہنا تھا کہ برطانوی ووٹروں کے لیے امیگریشن کا مسئلہ ’بہت تشویش‘ کا باعث تھا اور برطانیہ کی یورپی یونین کی سنگل مارکیٹ تک رسائی بھی ’بہت بڑا چیلنج‘ ہو گی۔
End of سب سے زیادہ پڑھی جانے والی
دوسری جانب جرمن چانسلر چانسلر انگیلا میرکل نے کہا ہے کہ یورپی اتحاد برطانیہ کے یورپی یونین سے الگ ہونے کے فیصلے کا ’ہر صورت احترام کرے۔‘
تاہم انگیلا میرکل اور یورپی اتحاد کے دیگر رہنماؤں نے اس بات پر زور دیا ہے کہ برطانیہ جتنا جلد ممکن ہو یورپی یونین چھوڑنے کے اپنے منصوبوں پر عمل کرے۔
یورپی اتحاد کے رہنما اس بات پر مصر ہیں کہ برطانیہ سے اس وقت تک غیر رسمی بات چیت نہیں کی جائے گی جب تک وہ باقاعدہ آرٹیکل 50 کو نافذ نہیں کرتا۔
انگیلا میرکل کا مزید کہنا تھا کہ اگر برطانیہ یورپی یونین کی سنگل مارکیٹ تک دوبارہ رسائی حاصل کرنا چاہتا ہے تو وہ آزادانہ نقل و حرکت کو ہر صورت تسلیم کرے۔
جرمن چانسلر نے کہا یورپی اتحاد کے ساتھ ظہرانے پر ہونے والے ملاقات میں برطانوی ریفرینڈم میں یورپی اتحاد سے نکلنے کے فیصلے پر ’بہت تفصیل اور شدت‘ سے غور کیا گیا۔
انھوں نے کہا کہ ہمیں برطانوی ریفرینڈم میں آنے والے نتیجے پر افسوس ہوا تاہم ہم نے واضح کر دیا ہے کہ برطانیہ کو آرٹیکل 50 کو نافذ کرنے کے لیے باقاعدہ بات چیت کرنے پڑے گی۔
