موت کے منہ سے شادی کی پیشکش

ایک امریکی شخص نے بلند عزم کا اظہار کرتے ہوئے اپنی گرل فرینڈ کو ایک عمودی چٹان پر چڑھتے ہوئے اپنے فون پر ویڈیو اپیلی کیشن کے ذریعے شادی کی پیشکش کرنے کا فیصلہ کیا۔

تاہم ان کی یہ کوشش اس وقت خبروں کا مرکز بنی جب مائیکل بینکس چٹان میں پھنس گئے اور انھیں نیچے اتارنے کے لیے امدادی کارکنوں کی مدد لینا بڑی۔

یہ ڈرامائی واقعہ کیلی فورنیا کی 600 فٹ بلند مورو راک پر پیش آیا۔

اچھی خبر یہ ہے کہ ان کی گرل فرینڈ نے ہاں کر دی ہے جبکہ بری خبر یہ ہے کہ انھیں امدادی کارکنوں کی مدد لینے پر بھاری رقم ادا کرنا ہوگی۔

چٹان کی بلندی پر پھنسے 27 سالہ مائیکل بینکس کو زمین پر اتارنے کے لیے ہیلی کاپٹر کی مدد لینا پڑی تھی۔

مورو بے کے امدادی کارکن کیپٹن ٹوڈ گیلے نے بتایا کہ ’وہ کسی بھی سمت نہیں جاسکتے تھے، ان کے پاؤں 80 فٹ گہرائی کی جانب لٹکے ہوئے تھے۔‘

واضح رہے کہ مورو راک پر مہم جوئی پر پابندی عائد ہے تاہم کچھ لوگ ایسی تنبیہات کو نظر انداز کر دیتے ہیں۔

گذشتہ برسوں میں یہاں پر گرنے سے کئی جان لیوا واقعات رونما ہوچکے ہیں۔