بغداد میں کار بم دھماکہ، 120 افراد ہلاک
،تصویر کا ذریعہAFP
عراق میں حکام کے مطابق ملک کے مصروف بازار میں ہونے والے کار بم دھماکے میں کم از کم 120 افراد ہلاک اور 130 زخمی ہو ئے ہیں۔
عراق کے مشرقی صوبے دیالا کے قصبے خان بنی سعد سے ملنے والی اطلاعات کے مطابق مرنے والوں میں بچے بھی شامل ہیں۔
یہ حملہ عراق کے دارالحکومت بغداد کے شمال میں واقع شیعہ اکثریتی علاقےخان بنی سعد نامی قصبے میں ہوا۔
عراقی پولیس کے مطابق یہ دھماکہ اس وقت ہوا جب لوگ مسلمانوں کے مقدس مہینے رمضان کے ختم ہونے کے بعد عید منا رہے تھے۔
پولیس کا کہنا ہے کہ شدید دھماکے کی وجہ سے عمارتیں تباہ ہو گئیں۔
دوسری جانب شدت پسند تنظیم ’دولتِ اسلامیہ‘ نے اس دھماکے کی ذمہ داری قبول کر لی ہے۔
’دولتِ اسلامیہ‘ کی جانب سے جاری ہونے والے بیان میں کہا گیا ہے کہ اس کے ایک رکن نے کار میں موجود تین ٹن وزنی بم ہجوم میں لے جا کر دھماکہ کر دیا
،تصویر کا ذریعہAFP
عراق پولیس کے میجر احمد الاتمیمی کا کہنا ہے کہ دھماکے سے ’ہولناک‘ نقصان ہوا ہے۔
End of سب سے زیادہ پڑھی جانے والی
انھوں نے کہا کہ چند افراد سبزی کے ڈبوں میں اپنے بچوں کی لاشوں کے ٹکڑوں کو اکھٹا کر رہے تھے۔
عینی شایدین کا کہنا ہے کہ جائے حادثہ کے ملبے سے لاشوں کو نکالنے کا کام جاری ہے۔
حکام نے دیالا صوبے میں تین دن کے سوگ کا اعلان کرتے ہوئے عید کی دوسری تقربیات پر پابندی عائد کر دی ہے۔
شدت پسند تنظیم ’دولتِ اسلامیہ‘ نے عراق کے ایک بڑے حصے پر قبضے کر رکھا ہے اور ملک کے شمالی اور مغربی علاقوں میں حکومتی فورسز کے درمیان جنگ جاری ہے۔
