ڈیلس میں پولیس ہیڈکوارٹر پر فائرنگ کرنے والا ہلاک
،تصویر کا ذریعہAP
امریکی ریاست ٹیکسس کے شہر ڈیلس میں پولیس ہیڈ کوراٹر پر فائرنگ کر کے فرار ہونے والے مسلح شخص کو گولی مار کر ہلاک کر دیا گیا ہے۔
مقامی پولیس کے مطابق یہ حملہ آور پولیس کے نشانہ باز کی گولی کا نشانہ بنا۔
پولیس نے تاحال اس شخص کی شناخت ظاہر نہیں کی ہے۔
فائرنگ کا یہ واقعہ جمعے کی شب پیش آیا تھا جب حملہ آور پولیس ہیڈ کوارٹر پر فائرنگ کرنے کے بعد ایک بکتر بند گاڑی میں فرار ہوا گیا تھا۔
پولیس ہیڈ کوارٹر کے قریب رہنے والے جوشوا گیلبوڈ نے بی بی سی سے بات کرتے ہوئے کہا کہ ’میں نے تقریباً دوسو گولیاں چلنے کی آواز سنی اور ایک زور داد دھماکہ بھی، پھر ہر طرف تباہ شدہ کاریں دیکھی جاسکتی تھیں۔‘
پولیس کی درجنوں گاڑیوں نے اس شخص کا پیچھا کر کے اسے ایک پارکنگ لاٹ میں گھیر لیا تھا۔
یہ گھیراؤ کئی گھنٹے تک جاری رہا جس کے بعد پولیس کے نشانہ باز نے سنیچر کی صبح اسے گولی مار کر ہلاک کر دیا۔
بعدازاں پولیس نے جب حملہ آور کی گاڑی میں موجود پائپ بموں کو تباہ کیا تو اس سے گاڑی میں آگ بھی لگ گئی۔
End of سب سے زیادہ پڑھی جانے والی
ڈیلس پولیس کا کہنا ہے کہ پولیس ہیڈکوارٹر پر فائرنگ کی کارروائی ذاتی رنجش کا نتیجہ لگ رہی ہے۔
دریں اثنا فائرنگ کے بعد جائے وقوعہ سے دھماکہ خیز مواد کے ملنے کے بعد پولیس ہیڈ کوارٹر کے آس پاس واقع رہائشی عمارتوں کو خالی کرا لیا گیا تھا اور ماہرین نے مشتبہ مواد کو ناکارہ بنایا۔
