’دولتِ اسلامیہ کے ہاتھوں 21 مصری قبطی عیسائیوں کی ہلاکت‘

شدت پسند تنظیم دولتِ اسلامیہ کی جانب سے جاری کی جانے والی ایک ویڈیو میں دکھایا گیا ہے کہ لیبیا سے اغوا کیے جانے والے 21 مصری قبطی عیسائیوں کے ’سر قلم کر دیے گئے ہیں‘۔

اس ویڈیو کی فوٹیج دکھاتی ہے کہ ایک گروپ جو نارنجی رنگ کے لباس میں ہے کو زمین پر گھنٹے ٹیکے دکھایا گیا ہے جس کہ بعد اُن کے سر قلم کر دیے گئے ہیں۔

یہ ویڈیو لیبیا کے جہادیوں نے پوسٹ کی ہے جن کا دعویٰ ہے کہ وہ دولتِ اسلامیہ سے منسلک ہیں۔

مصر سے ان قبطی عیسائیوں کی شناخت کے بارے میں کوئی اطلاع نہیں دی ہے مگر حکومت نے سات روزہ قومی سوگ کا اعلان کیا ہے۔

یاد رہے کہ دولتِ اسلامیہ کے شدت پسندوں نے لیبیا میں کئی حملے کیے ہیں جہاں کوئی بھی موثر حکومت نہیں ہے مگر لیبیا میں کئی مسلح گروہوں کی موجودگی میں یہ بات واضح نہیں ہے کہ دولتِ اسلامیہ کتنی طاقتور ہے۔

مصر کے صدر نے اس ہفتے کے شروع میں لیبیا میں پھنسے اپنے شہریوں کو ہوائی جہازوں کے ذریعے نکالنے کی پیشکش کی تھی۔

اغوا کیے جانے والے تمام کارکن قبطی عیسائی تھے جنہیں لیبیا کے مشرقی ساحلی شہر سرت سے اغوا کیا گیا تھا جو دولتِ اسلامیہ کے قبضے میں ہے۔

ان افراد کی رہائی کے لیے مصر میں مظاہرے کیے گئے اور حکومت پر زور دیا گیا کہ وہ اس سلسلے میں زیادہ کام کرے۔

جمعے کو دولتِ اسلامیہ نے مصریوں کی تصاویر جاری کی تھیں جس میں لکھا گیا تھا کہ انہیں اغوا کرنے کا مقصد مصری قبطی عیسائیوں کی جانب سے مسلمان خواتین پر تشدد اور انہیں ہلاک کرنے کا بدلہ لینا ہے۔

مصر کی حکومت نے اپنے لوگوں کو لیبیا کا سفر کرنے سے منع کیا ہے مگر پھر بھی لوگ وہاں روزگار کی تلاش میں جاتے ہیں۔