سعودی بلاگر کو کوڑے لگانے کی سزا تیسری بار ملتوی
،تصویر کا ذریعہAFP
سعودی عرب کے حکام کے مطابق بلاگر رائف بداوی کو دی جانے کوڑوں کی سزا دوبارہ ملتوی کر دی ہے۔
بلاگر رائف بداوی کو جمعے کو 50 کوڑے لگانے کی سزا دی جانے تھی تاہم اسے بغیر کوئی وجہ بتائے ملتوی کر دیا گیا ہے۔
یہ مسلسل تیسری بار ہے کہ ان کی سزا ملتوی کی گئی ہے۔
گذشتہ جمعے کو حقوق انسانی کی عالمی تنظیم ایمنسٹی انٹرنیشنل کے مطابق سعوی بلاگر بداوی کو دی جانے والی کوڑوں کی سزا طبی بنیادوں پر ملتوی کر دی تھی۔
ایمنسٹی انٹرنیشنل کے مطابق ڈاکٹروں کی تجویز پر بداوی کو دی جانے والی سزا کو طبی بنیادوں پر ملتوی کیا گیا۔
رائف بداوی کی اہلیہ انصاف حیدر نے بھی تصدیق کی تھی کہ ان کے شوہر کو جمعے کو کوڑوں کی سزا نہیں دی جائے گی تاہم انھیں اپنے شوہر کی صحت کے بارے میں تشویش ہے۔
انصاف حیدر 2012 میں اپنے شوہر پر قاتلانہ حملے کے بعداپنے تین بچوں کے ساتھ کینیڈا منتقل ہو گئی تھیں۔
End of سب سے زیادہ پڑھی جانے والی
رائف بداوی کو گذشتہ سال مئی میں توہین مذہب کے الزام میں دس سال قید اور ایک ہزار کوڑے مارنے کی سزا سنائی گئی تھی۔
،تصویر کا ذریعہBadawi Familly
کوڑوں کی سزا پر 20 ہفتوں میں پوری جانے تھی اور پہلی بار انھیں رواں ماہ کی نو تاریخ کو 50 کوڑے مارے گئے تھے تاہم گذشتہ جمعے کو کوڑوں کی سزا ملتوی کر دی گئی تھی۔
اس کے بعد بی بی سی کو حاصل ہونے والی معلومات کے مطابق سعودی شاہ کے دفتر نے سعودی بلاگر رائف بداوی کو ملنے والی ایک ہزار کوڑوں کی سزا نظرِ ثانی کے لیے سپریم کورٹ کو بھیج دی تھی۔
نو جنوری کو جدہ کی ایک مسجد کے باہر بداوی کو سرِ عام کوڑے مارے گئے تھے، جس پر امریکہ، کینیڈا، جرمنی اور ناروے سمیت کئی ملکوں نےتنقید کی تھی۔
بداوی نے سعودی عرب میں لبرل سعودی نیٹ ورک کے نام سے ایک آن لائن فورم تشکیل دیا تھا جس کا مقصد سعودی عرب میں مذہبی اور سیاسی معاملات پر بات چیت کی حوصلہ افزائی کرنا تھا۔
