دولتِ اسلامیہ نے اردن کا طیارہ نہیں گرایا: امریکہ

امریکہ نے کہا ہے کہ اردن کا ایف سولہ جنگی طیارہ جو دولت اسلامیہ کے زیر قبضہ علاقے میں گر کر تباہ ہوگیا ہے اسے دولت اسلامیہ کے جنگجوؤں نے نہیں گرایا ہے۔

دولت اسلامیہ کے جنگجوؤں نے طیارے کے پائلٹ فلائٹ لیفٹینٹ مواز یوسف کو گرفتار کرلیا ہے اور انٹرنیٹ پر اس کی تصاویر جاری کی ہیں۔

اس سے پہلے دولت اسلامیہ نے دعویٰ کیا تھا کہ اس نے اردن کے طیارے کو مار گرایا ہے۔

امریکہ نے کہا ہے کہ واضح شہادتیں اس جانب واضح اشارہ کرتی ہیں کہ دولت اسلامیہ نے اردن کے طیارے کو نہیں گرایا۔ البتہ امریکہ نے یہ واضح نہیں کیا کہ طیارہ کیسے گرا۔

اردن ان چار عرب ممالک میں سے ایک ہے جو امریکہ کی سربراہی میں قائم ہونے والے اس فوجی اتحاد کا حصہ ہیں جو شام میں گذشتہ تین ماہ سے دولتِ اسلامیہ کے ٹھکانوں پر بمباری کر رہا ہے۔

دولت اسلامیہ کیا ہے؟

اردن کا طیارہ رقہ کے قریب تباہ ہوا ہے۔ رقہ پر عراق اور شام میں سرگرم تنظیم دولتِ اسلامیہ کا کنٹرول ہے اور تنظیم کا دعویٰ ہے کہ اس نے اردنی فضائیہ کا جنگی طیارہ مار گرایا ہے اور پائلٹ ان کے قبضے میں ہے۔