بدھا کی توہین کے الزام میں تین افراد پر مقدمہ
،تصویر کا ذریعہPhilip Blackwood
برما میں ایک نیوزی لینڈ اور دو برمی باشندوں پر بودھ مت کی توہین کے الزام میں مقدمہ چلایا جا رہا ہے۔
یہ تینوں برما کے دارالحکومت میں ایک بار چلاتے ہیں اور ان پر الزام ہے کہ انھوں نے شراب کی تشہیر کے لیے ایک اشتہاری پرچہ شائع کیا جس میں بدھا کو ہیڈ فونز پہنے ہوئے دکھایا گیا ہے۔
یہ تصویر بار کے فیس بک صفحے پر شائع ہوتے ہی لوگوں نے آن لائن پر اس تصویر پر ناراضگی کا اظہار کیا۔
برما کے قانون کے مطابق مذہب کی توہین یا اسے نقصان پہنچانا غیر قانونی ہے۔ برما میں بودھ قوم پرستی میں اضافہ دیکھا گیا ہے۔
وی گاسترو کے اس اشتہار میں دکھایا گیا ہے کہ بدھا کی آنکھیں بند ہیں اور انھوں نے ہیڈ فون پہنے ہوئے ہیں اور ان کے ارد گرد بہت سے رنگ ہیں۔
اس اشتہار کے ساتھ لکھے گئے الفاظ میں کہا گیا تھا کہ بے حساب شراب اور شیشہ سے بھرپور شام۔
گذشتہ ہفتے پولیس نے اس بار کو بند کر کے اس کے جنرل مینیجر 32 سالہ فلپ بلیک وڈ اور دو برمی باشندوں کو کو گرفتار کر لیا تھا۔
،تصویر کا ذریعہAP
یہ گرفتاریاں مذہب سے متعلق سرکاری ادارے کی جانب سے شکایت پر کی گئیں۔
End of سب سے زیادہ پڑھی جانے والی
اس مقدمے میں چھ ماہ کا عرصہ لگ سکتا ہے اور تینوں کو دو دو برس تک جیل کی سزا ہو سکتی ہے۔
اس تصویر کو ہٹا کر اس جگہ معذرتی پیغام شائع کر دیا گیا ہے کہ اس تشہیر کا مقصد کسی مذہبی گروہ کی دل آزادی نہیں تھا۔
