چارلس سوبھراج کی رہائی کا حکم: 'بکنی کِلر' جس کی کئی ممالک کی پولیس کو برسوں تلاش رہی
،تصویر کا ذریعہAFP/Getty Images
- مصنف, ثمرہ فاطمہ
- عہدہ, بی بی سی اردو، لندن
اپنی پہچان بدلنے میں وہ ماہر تھا، اس لیے اسے پکڑنا آسان نہیں تھا۔ اس شخص نے 70 اور 80 کی دہائیوں میں دنیا کے کئی ممالک کی پولیس کی ناک میں دم کر رکھا تھا۔
یہ وہ دور تھا جب ایشیائی خطے میں مغربی ممالک سے آنے والے 'ہِپی' سیاحوں کی خاصی دلچسپی ہوا کرتی تھی۔ مہینوں گھر سے دور رہنے والے ایسے ہی بعض 'ہِپی' سیاح بدنام زمانہ قاتل چارلس سوبھراج نامی شخص کا شکار ہوئے۔
نیپال کی سپریم کورٹ نے فرانسیسی سیریل کلر چارلس سوبھراج کو رہا کرنے کا حکم دیا ہے۔ چارلس سوبھراج کی عمر اس وقت تقریباً 78 برس ہے اور وہ ان دنوں قتل کے جرم میں نیپال کی جیل میں قید ہے
بی بی سی نیپالی سروس کے مطابق یہ فیصلہ ان کی عمر کی بنیاد پر کیا گیا ہے۔ سوبھراج کی عمر 78 سال ہے اور وہ دل کے عارضے میں مبتلا ہے۔
سوبھراج دو امریکی سیاحوں کے قتل کے الزام میں 2003 سے نیپال کی جیل میں قید ہے۔
عدالت نے حکم دیا ہے کہ مجرم کی رہائی کے 15 دن کے اندر اسے ملک بدر کر دیا جائے۔
70 اور 80 کی دہائیوں میں دنیا کے کئی ممالک کی پولیس کی ناک میں دم کر دینے والے اس مجرم کو جیل کی سلاخوں کے پیچھے پہنچانا آسان نہیں تھا۔
چارلس سوبھراج کون ہے؟
اپنی شناخت بدلنے کی غیر معمولی صلاحیت اور نوجوان خواتین کو ہدف بنانے کی فطرت کے سبب دنیا سوبھراج کو 'دا سرپینٹ' اور 'بکنی کِلر' جیسے ناموں سے بھی پہچاننے لگی تھی۔
End of سب سے زیادہ پڑھی جانے والی
خیال ہے کہ سوبھراج کو ’بکنی کِلر‘ اس لیے کہا جاتا ہے کیوں کہ اس کا شکار ہونے والی خواتین کی لاشیں اکثر بکنیز میں ملا کرتی تھیں۔
گذشتہ برس بی بی سی کی ایک سیریز 'دا سرپینٹ' خاصی دلچسپی سے دیکھی گئی۔ یہ 70 اور 80 کی دہائیوں میں دھوکہ بازی، لوٹ مار اور قتل کی وارداتوں کے لیے دنیا کے کئی ممالک میں مطلوب شخص چارلس سوبھراج کی زندگی پر مبنی ہے۔
جب موت کی سزا سے بچنے کے لیے سوبھراج جیل گئے
نیپال کی جیل میں قید سوبھراج پر انڈیا، تھائی لینڈ، نیپال، ترکی اور ایران میں قتل کے 20 سے زیادہ الزامات عائد ہوئے لیکن 2004 سے قبل کوئی بھی سوبھراج کو قتل کا مجرم ثابت نہیں کر سکا۔
سوبھراج جانتا تھا کہ اسے کن ممالک کی پولیس کے ہاتھ نہیں آنا ہے، کیوں کہ ان ممالک میں قتل ثابت ہونے پر اسے موت کی سزا دی جا سکتی تھی، مثال کے طور پر تھائی لینڈ میں۔
یہ بھی پڑھیے
انڈیا میں فرانسیسی سیاحوں کو زہر دینے کے معاملے میں گرفتار ہونے کے بعد وہ 20 برس انڈین جیل میں قید رہا۔
اصل میں سزا اتنی طویل نہیں تھی اور انڈیا میں سزا ختم ہونے پر سوبھراج کو تھائی لینڈ پولیس کی تحویل میں دیا جانا تھا۔ سوبھراج کو معلوم تھا کہ تھائی لینڈ میں اگر قتل ثابت ہو گیا تو اسے موت کی سزا مل سکتی تھی۔
اس لیے انڈیا میں سزا مکمل ہونے سے کچھ عرصہ قبل ہی سوبھراج جیل سے فرار ہوگیا اور کچھ روز بعد دوبارہ جب پکڑا گیا تو اس کی سزا دس برس بڑھا دی گئی۔
اس طرح انڈیا کی جیل میں 20 برس مکمل ہونے کے بعد 1997 میں جب سوبھراج رہا ہوا تب تک تھائی لینڈ میں اس کے خلاف وارنٹ کی معیاد ختم ہو چکی تھی۔
اس تحریر میں ایسا مواد ہے جو Google YouTube کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے Google YouTube ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
YouTube پوسٹ کا اختتام
سوبھراج اپنی شناخت کیسے بدلتا تھا
سوبھراج کو پکڑنا اس لیے بھی مشکل تھا کہ وہ اپنی شناخت تبدیل کر کے مختلف ممالک کا سفر کیا کرتا تھا۔ وہ بڑی ہوشیاری سے ان لوگوں کے پاسپورٹ خود اپنی شناخت بدلنے کے لیے استعمال کرتا جنہیں وہ قتل کرتا تھا۔ پاسپورٹ پر تصویر بدلنا اور فرضی پاسپورٹ تیار کرنا اس کے لیے مشکل نہیں تھا۔
ماہرین کے مطابق اس کے جرائم کا طریقہ ہمیشہ ایک جیسا رہا۔ وہ سیاحوں کے درمیان خود کو جواہرات اور منشیات کے ڈیلر کے طور پر پیش کرتا تھا۔
منشیات کا استعمال کرنے والے فرانسیسی اور انگریزی بولنے والے سیاحوں سے دوستی کرتا اور پھر انھیں قتل کر دیتا۔
سوبھراج پر مقدمات اور ڈچ سفارتکار کا کردار
،تصویر کا ذریعہAFP/Getty Images
سوبھراج پر مختلف اوقات میں قتل کے 20 سے زیادہ الزامات عائد ہوئے۔ ان تمام معاملوں میں متاثرین کو پہلے نشے کی دوا دی گئی اور پھر انھیں مارا گیا۔ چند معاملوں میں انھیں قتل کر کے ان کی لاشوں کو جلا دیا گیا۔
ایسے ہی دو متاثرین نیدرلینڈز کے شہری تھے۔ اس جوڑے کو تھائی لینڈ میں قتل کر کے جلا دیا گیا تھا۔ ان دونوں کی ہلاکت کی اپنے طور پر تفتیش کرنے والے ڈچ سفارتکار ہرمن کنیپنبرگ اور ان کی اہلیہ اینگلا کین نے سوبھراج کے خلاف ثبوت اکٹھا کرنے اور جرائم کی تفتیش میں مختلف ممالک کے تعاون کے بین الاقوامی ادارے انٹرپول کی نظر میں یہ معاملہ لانے میں اہم کردار ادا کیا۔
کنیپنبرگ نے اپنی تحقیقات کے دوران سوبھراج کے خلاف جو تصاویر اور پاسپورٹز حاصل کیے تھے انھیں آخر کار نیپال میں سوبھراج کے خلاف مقدمے میں استعمال کیا گیا۔
جیل سے بار بار فرار
جتنا مشکل سوبھراج کو پکڑنا تھا، اتنا ہی مشکل اسے فرار ہونے سے روکنا بھی سمجھا جاتا تھا۔
سوبھراج یا تو پولیس کو چکما دے کر جیل سے فرار ہو جاتا یا جیل میں اہلکاروں کو رشوت دے کر تمام سہولیات وہیں فراہم کرا لیتا۔ انڈین جیل میں اس کے پاس ٹی وی، عمدہ کھانا اور سگریٹ جیسی تمام اشیا کی فراہمی وہ اہلکار یقینی بناتے تھے جنہیں مبینہ طور پر سوبھراج نے رشوت دے کر دوست بنایا ہوا تھا۔
سوبھراج انڈیا کے علاوہ افغانستان، ایران اور یونان کی جیلوں سے بھی فرار ہونے میں کامیاب رہا۔
چارلس سوبھراج کی پہلی گرفتاری
،تصویر کا ذریعہAFP/Getty Images
سوبھراج نے جرائم کا آغاز 1963 میں ایشیا کے دورے کے دوران کیا تھا۔
اسی دوران دلی کے اشوکا ہوٹل میں لوٹ مار کے معاملے میں سوبھراج کو دلی میں پہلی بار گرفتار کیا گیا تھا۔ اس وقت بھی سوبھراج جیل سے فرار ہونے میں کامیاب رہا تھا۔
ہوا کچھ یوں کہ اپینڈکس کے درد کا بہانا کر کے وہ جیل سے ہسپتال پہنچا اور وہاں سے بھاگنے میں کامیاب رہا۔
اگلی بار 1976 میں جب وہ دوبارہ گرفتار ہوا تو دس برس بعد جیل سے بھاگنے کا کہیں زیادہ خطرناک طریقہ اختیار کیا۔
سوبھراج نے جیل میں ایک دعوت کا انعقاد کیا۔ اس دعوت میں قیدیوں کے علاوہ جیل اہلکاروں کو بھی مدعو کیا گیا۔
دعوت میں کھلائے جانے والے بسکٹ اور انگوروں میں نیند کی دوا ملا دی گئی تھی۔ تھوڑی دیر بعد سوبھراج اور اس کے ساتھ چار مزید قیدیوں کے علاوہ باقی سبھی نڈھال ہو گئے۔
اس طرح سوبھراج اور چار قیدی جیل سے فرار ہو گئے۔ اس دور کے اخباروں کے مطابق سوبھراج کے تکبر کی اس وقت یہ حد تھی کہ جیل کے باہر دروازے پر اس نے تصویر بھی کھنچوائی۔
سوبھراج الفاظ کا کھیل بہت اچھی طرح جانتا تھا۔ ریچرڈ نیول کی لکھی سوبھراج کی سوانح حیات میں انھوں نے کہا تھا 'جب تک میرے پاس لوگوں سے بات کرنے کا موقع ہے، میں انہیں بہلا پھسلا سکتا ہوں۔'
سوبھراج کا ساتھ دینے والی خاتون اور سزا
1997 میں انڈیا کی جیل میں اپنی سزا مکمل کرنے کے بعد 2003 میں سوبھراج ایک بار پھر نیپال پہنچا، جہاں اسے گرفتار کر لیا گیا۔ اس سے پہلے سوبھراج 70 کی دہائی میں اپنی اس وقت کی گرل فرینڈ مری اینڈی لیکریک کے ساتھ نیپال کا سفر کر چکا تھا۔
سوبھراج پر نیپال میں قتل کے الزامات تھے اس لیے اس بارے میں بہت سی قیاس آرائیاں کی جاتی ہیں کہ آخر وہ خود ہی نیپال کیوں چلا گیا اور اس کی اصل وجہ تو شاید وہ صرف خود ہی جانتا ہے۔
سوبھراج پر 28 برس قبل فرضی پاسپورٹ پر نیپال جانے اور کینیڈین شہری اور ایک امریکی خاتون کے قتل کے الزام تھے۔ سوبھراج نے تب بھی ان الزامات کو مسترد کیا، لیکن پولیس کا دعویٰ تھا کہ ان کے پاس معقول ثبوت موجود ہیں۔
اصل میں جب سوبھراج کی انڈیا میں گرفتاری ہوئی تب ان کی گرل فرینڈ مری اینڈی لیکریک کو بھی گرفتار کر لیا گیا تھا۔
1976 میں انڈیا میں گرفتاری کے وقت مری نے جو بیان دیا تھا اس میں انھوں نے قبول کیا تھا کہ انھوں نے تھائی لینڈ میں بھی سوبھراج کی جرائم میں مدد کی تھی۔ مری نے سوبھراج کے ساتھ فرضی پاسپورٹ پر نیپال جانے اور اس دوران ہونے والے قتل کی تفصیلات بھی پولیس کو بتائی تھیں۔
ان کے اس بیان نے نیپال میں سوبھراج کا جرم ثابت کرنے میں اہم کردار ادا کیا۔ حالانکہ جب یہ مقدمہ چلا تب تک مری حیات نہیں تھیں۔ کینسر کے مرض کی وجہ سے 1984 میں ان کی موت ہو چکی تھی۔
بلآخر نیپال میں سنہ 2004 میں سوبھراج کو دسمبر 1975 میں کیے گئے ایک قتل کے جرم میں قید کی سزا سنائی گئی۔ اگلے چند برسوں میں اس سزا کے خلاف سوبھراج کی دو اپیلیں مسترد ہوئیں۔
سنہ 2014 میں نیپال کی ایک عدالت نے سوبھراج کو دسمبر 1975 میں کیے گئے ایک دوسرے قتل میں مزید 20 برس قید کی سزا سنائی جس کے خلاف مجرم نے کوئی اپیل نہیں کی۔
،تصویر کا ذریعہAFP/Getty Images
کہا جاتا ہے کہ مری سوبھراج سے بہت محبت کرتی تھیں اور تھائی لینڈ میں جب وہ مقامی خواتین کے ساتھ تعلقات قائم کرتے تھے تو وہ خود ان معاشقوں کو کاروبار کے لیے ضروری بتا کر نظر انداز کر دیا کرتی تھیں۔
دلچسپ بات یہ ہے کہ نیپال میں سزا کے دوران بھی ایک نیپالی خاتون نہیتا بسواس نے دعویٰ کیا کہ ان کی اور چارلس کی جیل میں شادی ہو گئی ہے۔ حالانکہ جیل کے اہلکار نہیتا کے ان دعووں کو مسترد کرتے ہیں۔
کیا تلخ ماضی نے سوبھراج کو مجرم بنایا؟
،تصویر کا ذریعہAFP/Getty Images
ماضی میں شاید ان باتوں پر اتنا غور نہیں کیا جاتا ہو لیکن آج اس بات کو خاصی توجہ دی جاتی ہے کہ کسی کے مجرم بننے میں کیا اس کے حالات کا بھی ہاتھ رہا؟
سوبھراج کے معاملے میں اس بارے میں یقینی طور پر کچھ کہنا ممکن نہیں، لیکن یہ ضرور ہے کہ سوبھراج کے والد نے اسے اپنانے سے انکار کر دیا تھا۔
سوبھراج کے دل میں اپنے والد کے خلاف بہت غصہ تھا۔ سوبھراج نے اپنی ڈائری میں لکھا تھا 'میں آپ کو اس بارے میں افسوس ظاہر کرنے پر مجبور کر دوں گا کہ آپ نے ایک والد ہونے کا فرض ادا نہیں کیا۔'
ویتنام کے شہر سائیگان میں 6 اپریل 1944 کو پیدا ہونے والے چارلس سوبھراج کی پرورش فرانس میں ہوئی تھی۔
لیکن جرائم کے لیے انھوں نے دنیا کے مختلف ممالک خاص طور پر ایشیائی ممالک کا رخ کیا۔
چارلس سوبھراج کی والدہ کا تعلق ویتنام سے تھا اور والد انڈین تھے۔ ان دنوں سائیگان پر جاپان کا قبضہ تھا۔ فرانسیسی کالونی ہونے کے سبب انھیں فرانسیسی شہریت حاصل ہو گئی۔
سوبھراج کی زندگی کی کہانی اتنی غیر معمولی ہے کہ جب 1997 میں وہ انڈیا کی جیل سے آزاد ہو کر فرانس پہنچے تو فرانس کے ایک اداکار اور پروڈیوسر نے ان سے ان کی زندگی پر فلم اور کتاب کے حقوق مبینہ طور پر ایک کروڑ پچاس لاکھ ڈالر میں خرید لیے۔
سنہ 2015 میں ریلیز ہونے والی بالی وڈ فلم 'میں اور چارلز' میں چارلس سوبھراج کا کردار ادا کرنے والے رندیپ ہوڈا نے دعویٰ کیا تھا کہ امیتابھ بچن کی فلم 'ڈان' کا مشہور ڈائیلاگ سوبھراج کی زندگی سے متاثر تھا: 'ڈان کا انتظار تو 11 ملکوں کی پولیسں کر رہی ہے'۔
