بیروت کی سحر فارس: 'شادی کا سفید جوڑا پہننا تھا مگر سفید تابوت میں دفنایا'

سحر فارس آگ بھجانے والے عملے کے ساتھ کام کرنے والے طبی عملے کا حصہ تھیں۔ وہ بیروت میں آگ لگنے کے واقعے پر جائے حادثہ پر زندگیاں بچانے اور فوری امداد فراہم کرنے کے لیے گئی تھیں۔ مگر وہاں ہونے والے دھماکے میں اپنی جان کھو بیٹھیں۔ بیروت میں اس ہولناک حادثے کے بعد سحر کی ہلاکت کی خبر اور اُن کی تصاویر کثرت سے سوشل میڈیا پر شیئر کی گئی۔

سحر کی کہانی نے بیروت ہی نہیں بلکہ باقی دنیا میں بھی لوگوں کے دل توڑ دیے ہیں۔ سحر صرف 27 برس کی تھیں، اُن کی منگنی ہوچکی تھی اور عنقریب شادی ہونی تھی۔

سحر کے منگیتر گلبرٹ کرآن نے بی بی سی سے بات کرتے ہوئے اس حادثے کے بارے میں بات کرتے ہوئے بتایا کہ 'وہ وہاں پہنچی اور اُس نے مجھے وہاں سے ویڈیو بھیجی۔'

بی بی سی کے نامہ نگار کوئنٹن سمروال نے یہ ویڈیو شیئر کرتے ہوئے بتایا کہ سحر نے جب اپنے منگیتر کو یہ ویڈیو بھیجی تو اُنہوں نے گوگل میپس پر دیکھ کر جگہ کا تعین کیا اور سحر کے نگران کو فون کر کہا کہ وہ انہیں وہاں سے نکلنے کا کہیں۔ یہ ویڈیو سحر کی زندگی میں اُن کی جانب سے لی گئی آخری ویڈیو تھی۔

سحر کے منگیتر گلبرٹ نے اس ویڈیو کے بارے میں بی بی سی کو بتایا کہ 'میں نے اُسے ویڈیو کال کی تاکہ دیکھوں کہ وہاں کیا ہو رہا ہے۔ میں نے اُس سے کہا کہ اگر وہاں کچھ ہو رہا ہے تو بھاگو۔ اُس نے میری طرف دیکھا۔ میں نے اُس سے ایک بار پھر کہا کہ اگر کچھ گڑبڑ ہے تو بھاگو۔ اُس نے بھاگنا شروع کیا۔ وہ بھاگ رہی تھی اور میں چیخ رہا تھا کہ بھاگو، بھاگو، بھاگو!۔'

اس دردناک کال کے بارے میں مزید بات کرتے ہوئے گلبرٹ کرآن نے بتایا کہ 'مجھے صحیح دورانیہ یاد نہیں لیکن 9 یا 10 سیکنڈ کے بعد پہلا دھماکہ ہوا اور فون بند ہوگیا۔'

سحر اپنی شادی کی تیاریاں کر رہی تھیں اُن کی منگنی کی انگوٹھی اُن کی لاش سے ملی۔ اُن کے منگیتر گلبرٹ کرآن اس انگوٹھی کو اپنے گلے میں ایک چین میں پہنتے ہیں۔

بی بی سی کے نامہ نگار کوئنٹن سمرول نے سحر فارس اور اُن کے منگیتر کی خوشیاں مناتے ہوئے ویڈیو شیئر کی۔

گلبرٹ کہتے ہیں کہ 'اُس کے ساتھ شادی کرنی تھی جس میں انہوں نے سفید جوڑا پہننا تھا۔مگر میں نے اُسے سفید تابوت میں دفنایا'

ماری جو نے سحر کی کے جنازے کی تصویر شیئر کرتے ہوئے لکھا کہ 'اُن کے گھر والے اُن پر ایسے پھول کی پتیاں پھینک رہے ہیں جیسے اُن کی شادی کے دوران کرتے۔ یہ واقعی بہت المناک ہے۔'

مستقبل کے بارے میں بات کرتے ہوئے گلبرٹ کہتے ہیں کہ 'اسے کی جگہ کون لے سکتا ہے؟' اُن کا مزید کہنا تھا کہ 'میرا دل و دماغ سُن ہوگیا ہے کچھ محسوس نہیں ہورہا۔'

اپنی منگیتر سحر فارس کو یاد کرتے ہوئے وہ کہتے ہیں کہ 'آپ یہ کیسے دیکھ سکتے ہیں کہ وہ گلاب جیسی لڑکی جو سو مردوں جتنی مضبوط تھی، وہ کیسے یوں ہلاک ہوسکتی ہے؟ میں چاہتا ہوں کے کوئی مجھے یہ سمجھائے۔'

لبنان کے دارالحکومت بیروت میں چار اگست کو ہونے والے دھماکے کے بعد سے حکومت کی نا اہلی پر عوام کے غیض و غضب میں مسلسل اضافے کے بعد گزشتہ روز لبنان میں حکومت نے مستعفی ہونے کا اعلان کیا تھا۔

گذشتہ منگل کو ہونے والے دھماکے میں چار ہزار سے زیادہ افراد زخمی اور دو سو سے زیادہ ہلاک ہوئے تھے۔