ڈاکٹروں کے مطابق اونچی ایڑی سے پٹھوں، نسوں اور ریڑھ کی ہڈی کو شدید نقصان پہنچتا ہے۔

تو پھر عورتیں انھیں کیوں پہنتی ہیں؟

حیرت انگیز طور پر پہلے مردوں نے اونچی ایڑی کے جوتے پہننا شروع کیے تھے۔ قدیم زمانے کے ایرانی گھڑسوار اونچی ایڑی استعمال کرتے تھے تاکہ رکاب میں پاؤں زیادہ آسانی سے جمایا جا سکے۔

2016 میں لندن میں ایک ریسیپشنسٹ کو اس لیے نوکری سے نکال دیا گیا کہ انھوں نے اونچی ایڑی کے جوتے پہننے سے انکار کر دیا تھا۔ انھوں نے برطانوی حکومت سے مطالبہ کیا کہ وہ اپنے ملازموں کو اونچی ایڑی کے جوتے پہننے پر مجبور کرنے کے خلاف قانون سازی کریں۔

حکومت نے قانون تو نہیں بدلا لیکن کہا کہ وہ کام کی جگہ پر ڈریس کوڈ کے سلسلے میں ہدایت نامے میں بہتری کے لیے کام کرے گی۔

چند سال قبل اداکارہ ایما ٹامپسن نے گولڈن گلوب ایوارڈز کی تقریب میں سٹیج پر اونچی ایڑی کے جوتے اتار دیے اور کہا کہ ان کے پاؤں درد کر رہے ہیں۔ بقیہ تقریب میں انھوں نے ننگے پاؤں شرکت کی۔