آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
جاپان میں سمندری طوفان جیبی سے شدید تباہی، اہم ہوائی اڈہ بند
جاپان میں آنے والے جان لیوا جیبی طوفان کے بعد ایک اہم بین الاقوامی ہوائی اڈے کو بند کر دیا گیا ہے اور وہاں پھنسے ہزاروں افراد کو وہاں سے نکال لیا گیا ہے۔
کانسائی ایئرپورٹ کو، جو کہ اوساکا، کوبے اور کیوٹو کے لیے اہم ٹرانسپورٹ کا ذریعہ ہے، اس وقت بند کر دیا گیا جب اسے زمین سے ملانے والے پل کے ساتھ ایک کشتی ٹکرائی اور پل کو شدید نقصان پہنچا۔
جاپان میں گذشتہ 25 سال میں آنے والے شدید ترین سمندری طوفان جیبی میں اب تک دس افراد ہلاک ہو چکے ہیں۔
جیبی طوفان نے ملک کے مغربی علاقوں میں تباہی مچائی ہے اور کیوٹو اور اوساکا جیسے بڑے شہروں میں نقصان پہنچایا ہے۔
ہوائی پروازیں، ٹرینیں اور کشتیوں کی آمدورفت معطل کر دی گئی ہے جبکہ اوساکا کے بین الاقوامی ہوائی اڈے پر پھنسے ہزاروں مسافروں کو بحفاظت نکال لیا گیا ہے۔
ہواؤں کی شدت میں کمی آرہی ہے اور اس کا رخ شمال کی جانب ہے تاہم لوگوں کو تودے گرنے اور سیلاب کے خطرے کے پیش نظر گھروں میں رہنے کی ہدایت کی گئی ہے۔
یہ بھی پڑھیں
End of سب سے زیادہ پڑھی جانے والی
جاپانی حکومت کے ترجمان یوشیہیدے سوگا کے مطابق طوفان سے کم از کم 300 افراد زخمی ہوئے ہیں۔
بدھ کی صبح 12 لاکھ سے زائد افراد کے انخلا کی ہدایت جاری کی گئی تھی۔
فائر اینڈ ڈیزاسٹر میجنمنٹ ایجنسی کے مطابق 30 ہزار سے زائد افراد کو انخلا کا سخت حکم دیا گیا ہے تاہم یہ لازمی طور پر انخلا کا حکم نہیں ہے۔
سوشل میڈیا میں جاری ہونے والی ایک ویڈیو میں 100 میٹر بلند ایک فیرس ویل جھولے تو ہوا سے تیزی کے ساتھ گھومتے ہوئے دیکھا جا سکتا ہے جبکہ اس کو بند کیا ہوا تھا۔
طوفان سے 20 لاکھ سے زائد گھرانوں کو بجلی کی فراہمی متاثر ہوئی ہے جبکہ متاثرہ علاقوں میں سکول اور دفاتر بند ہیں۔
نوگویا اور اوساکا میں بین الاقوامی پروازوں سمیت 800 کے قریب پروازیں معطل ہوئی ہیں۔
بدھ کو اوکاسا کے کنسائی انٹرنیشنل ایئرپورٹ پھر پھنسے مسافروں کو کشتی کے ذریعے ایک اور مقامی ہوائی اڈے تک پہنچایا گیا ہے۔
یہ ہوائی اڈہ ایک مصنوعی جزیرے پر تعمیر کیا گیا ہے اور تقریبا 3000 افراد ہوائی اڈے پر اس وقت پھنس گئے تھے جب اور ایک ٹینکر کے ٹکرانے سے اس کو ساتھ ملانے والا پل ٹوٹ گیا تھا۔
بدھ کو ہوائی اڈے کے رن ویز اور زیر زمین کمروں میں پانی بھرگیا تھا۔
