امریکی چیئر لیڈر کو ’کنوارپن کی وجہ سے تنگ کیا گیا‘
،تصویر کا ذریعہINSTAGRAM/ KRISTAN.ANN
امریکی فٹبال ٹیم میامی ڈولفنز کی ایک سابق چیئر لیڈر نے ٹیم کے خلاف باضابطہ رپورٹ درج کروائی ہے جس میں کہا گیا ہے کہ انھیں ان کے مذہب اور کنوارپن کی وجہ سے تنگ کیا گیا تھا۔
27 سالہ کرسٹن این ویئر نے کہا کہ انھوں نے ٹیم کے میچوں کے درمیان رقص اس وقت بند کر دیا جب 2016 میں ٹیم کے ڈائریکٹر کے ساتھ انٹرویو میں ان کی جنسی زندگی پر بات کی گئی۔
وہ پہلی چیئر لیڈر نہیں ہیں جنھیں کام کے دوران معاندانہ رویے کا سامنا کرنا پڑا ہے۔
نیو اورلینز سینٹس کی ایک سابق چیئر لیڈر نے بھی شکایت کی تھی کہ انھیں سوشل میڈیا پر شب خوابی کا لباس پہنے ہوئے تصاویر پوسٹ کرنے کی وجہ سے برطرف کر دیا گیا تھا۔
این ویئر نے ریاست فلوریڈا کے انسانی حقوق کے کمیشن کو باضابطہ شکایت دے دی ہے۔ تاہم وہ کہتی ہیں کہ اس کا یہ مطلب نہیں کہ وہ امیریکن فٹبال کو نشانہ نہیں بنانا چاہتیں۔
انھوں نے بی بی سی کو بتایا: 'میں ان کے خلاف نہیں ہوں۔ میں صرف چیئر لیڈرز کے لیے بہتر حالاتِ کار چاہتی ہوں۔'
این ویئر کے مطابق یہ واقعہ لندن میں پیش آیا جس کے بعد انھیں بار بار تنگ کیا گیا۔
،تصویر کا ذریعہGetty Images
انھوں نے اپنی عرضی میں لکھا ہے کہ جب 2015 میں ٹیم نے لندن کے ویمبلی سٹیڈیم میں میچ کھیلا تو رقاصاؤں نے اپنی 'جنسی فہرست' کے بارے میں بات کی۔
End of سب سے زیادہ پڑھی جانے والی
این ویئر سے بھی اپنی 'فہرست' دینے پر دباؤ ڈالا گیا، جس کے بعد انھیں اعتراف کرنا پڑا کہ وہ کنواری ہیں۔
این ویئر کی وکیل سارا بلیک ول نے کہا: 'کرسٹن این ویئر نے اپنی ساتھیوں کو بتایا کہ ان کا خدا کے ساتھ تعلق ہے اس لیے وہ شادی تک انتظار کریں گی۔'
بعد میں جب رقاصاؤں کی سالانہ کارکردگی کا جائزہ لیا گیا، جس کے دوران انھیں دوبارہ اپنی ملازمت کے لیے درخواست دینا ہوتی ہیں، تو ٹیم کی ڈائریکٹر ڈوری گروگن نے این ویئر سے ان کے دعوے کے بارے میں پوچھا۔
این ویئر کہتی ہیں کہ ڈائریکٹر نے کہا: 'چلو اب اس بارے میں بات کرتے ہیں کہ آپ کنواری ہیں۔'
ٹیم کے ذرائع نے بی بی سی کو بتایا: '2016 میں ہمیں ایک واقعے کا پتہ چلا تھا جس میں ہماری چیئر لیڈرز ہمارے معیار اور توقعات پر پورا نہیں اتری تھیں۔
اس تحریر میں ایسا مواد ہے جو Instagram کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے Instagram ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
Instagram پوسٹ کا اختتام
'ہم نے فوری طور پر اس معاملے پر توجہ کی اور سپروائزر کو تنبیہ جاری کی، جس نے بعد میں پوری ٹیم سے معافی مانگی۔'
تاہم امریکی میڈیا کے مطابق گروگن ابھی تک اسی عہدے پر کام کر رہی ہیں۔
این ویئر کا دعویٰ ہے کہ جب انھوں نے ڈولفنز کے لیے بلاگ لکھا تو اس میں سے خدا اور مسیح کا ذکر حذف کر دیا گیا۔
میامی ڈولفنز نے ایک بیان میں کہا ہے کہ 'ہم اپنے ادارے کے ہر فرد کے ساتھ یکساں سلوک کرتے ہیں اور کسی کو اس کی صنف، نسل یا مذہب کی بنیاد پر تعصب کا نشانہ نہیں بناتے۔'
