 | | | مرلی دھرن نے اس میچ میں دس وکٹیں حاصل کیں |
سری لنکا نے میر پور میں کھیلے جانے والے پہلے ٹیسٹ میچ میں بنگلہ دیش کو ایک سو سات رن سے شکست دے دی ہے۔ سری لنکا نے بنگلہ دیش کو فتح کے لیے پانچ سو اکیس رن کا ہدف فراہم کیا تھا تاہم محمد اشرفل کی سنچری اور شکیب الحسن کے چھیانوے رن بھی اپنی ٹیم کے کام نہ آ سکے اور بنگلہ دیشی ٹیم چار سو تیرہ رن بنا کر پویلین لوٹ گئی۔ ان دونوں بلے بازوں کے علاوہ رحیم نے بھی عمدہ بلے بازی کا مظاہرہ کرتے ہوئے اکسٹھ رنز کی اننگز کھیلی۔ سری لنکا کی جانب سے مرلی دھرن نے چار، پرساد نے تین جبکہ واس نے ایک وکٹ حاصل کی۔ مرلی دھرن نے اس میچ میں کل دس وکٹیں حاصل کیں۔ سری لنکا نے کپتان مہیلا جے وردھنے کی عمدہ بلے بازی کی بدولت دوسری اننگز چار سو پانچ رنز چھ کھلاڑی آؤٹ پر ڈکلیئر کر دی تھی۔ جے وردھنے نے بیس چوکوں اور ایک چھکے کی مدد سے ایک سو چھیاسٹھ رنز بنائے تھے۔ جے وردھنے کے علاوہ کمارا سنگاکارا نے بھی نصف سنچری سکور کی اور سڑسٹھ رنز بنا کر آؤٹ ہوئے۔ سیریز کا دوسرا اور آخری ٹیسٹ بوگرا میں تین جنوری سے کھیلا جائے گا۔ | 
سری لنکا کو دورۂ پاکستان کی اجازت
