مناء رانا بی بی سی اردو ڈاٹ کام لاہور

یہ اعلان پاکستان اولمپک ایسوسی ایشن کے صدر لیفٹیننٹ جرنل ریٹائرڈ عارف حسن نے سنیچر کے دن لاہور میں پی او اے کے ایگزیکٹو باڈی کے اجلاس کے بعد کیا۔

اس اجلاس میں اولمپک گیمز اور بارہ سے اٹھارہ اکتوبر تک بھارت میں ہونے والے دولت مشترکہ کے لیے پاکستانی دستوں کی منظوری دی گئی۔

اولمپکس میں پاکستان کا دستہ 36 افراد پر مشتمل ہوگا جن میں اکیس کھلاڑی اور پندرہ آفشلز ہوں گے۔

اکیس کھلاڑیوں میں سے سولہ تو پاکستان کی ہاکی ٹیم کے رکن ہیں۔دو تیراک ، دو اتھلیٹ اور ایک شوٹر بھی المپک کھیلوں میں پاکستان کی نمائندگی کریں گے۔ ان تینوں کھیلوں میں پاکستانی کھلاڑی وائلڈ کارڈ انٹری پر شرکت کریں گے جبکہ اولمپک کے ہاکی کے مقابلوں کے لیے پاکستان کی ہاکی ٹیم نے کوالیفائی کیا ہے۔

پی او اے کے صدر لیفٹیننٹ جرنل ریٹائرڈ عارف حسن کے مطابق وائلڈ کارڈ انٹری پر بھیجے گئے کھلاڑیوں کا انتخاب ان کے کھیلوں کی عالمی فیڈریشن کرتی ہے۔انہوں نے کہا کہ کرن خان کے نام کی انہوں نے منظوری دے دی ہے اور مرد تیراک اور ایک اتھلیٹ مرد اور ایک اتھلیٹ خاتون کے ناموں کی منظوری ابھی نہیں ہوئی۔

اولمپک کے لیے پاکستان سے شوٹنگ کے کھیل میں صدیق عمر کا نام پہلے ہی منتخب ہو چکا ہے۔

پی او اے کے صدر کے مطابق جو کھلاڑی وائلڈ کارڈ انٹری پر شرکت کر رہے ہیں ان سے تو میڈل کی توقع نہیں کی جا سکتی البتہ ہاکی ٹیم کے ساتھ امیدیں باندھ رکھی ہیں لیکن ان کے پورا ہونے کے لیے دعا کی ضرورت ہے۔

انہوں نے کہا کہ کسی بھی ٹیم یا کھلاڑی کا سال میں ایک پیک ٹائم ہوتا ہے اور پاکستان کی ہاکی ٹیم اذلان شاہ کھیلنے کے بعد آج کل جرمنی میں ہے اور ہماری خواہش اور دعا ہے کہ ہماری ٹیم کا پیک کا وقت المپکس میں آئے۔

جنرل عارف حسن نے بتایا کہ دولت مشترکہ کھیلوں میں پاکستان چھ کھیلوں میں شرکت کرے گا اور دستہ سولہ کھلاڑیوں اور پانچ آفیشلز پر مشتمل ہو گا۔

پاکستان میں کھیلوں کے گرتے ہوئے معیار کی بارے پی اور اے کے صدر نے کہا کہ اگرچہ کچھ کھیل ماضی کی نسبت تنزلی کا شکار ہیں جیسے ہاکی اور باکسنگ لیکن کچھ کھیلوں میں ہماری جونیر اور سئنیر کھلاڑیوں نے ایشیا کی سطح پر میڈلز لیے ہیں۔ اور میڈلز ینے والے جونیر کھلاڑی چاہے وہ کسی بھی کھیل سے ہوں انہیں سہولتیں دی جائیں گی تاکہ وہ مزید بہتر ہوں۔