عبدالرشید شکور بی بی سی اردو ڈاٹ کام، کراچی

	شعیب اختر ڈسپلنری کمیٹی کے سامنے پیش نہیں ہوئے

واضح رہے کہ دونوں کرکٹرز کو پاکستان کرکٹ بورڈ پر تنقید کرنے پر ممکنہ کارروائی کا سامنا ہے۔

شعیب اختر نے زمبابوے کے خلاف ون ڈے سیریز میں نہ کھلائے جانے پر بورڈ حکام پر کڑی تنقید کی تھی جبکہ دانش کنیریا نے سینٹرل کنٹریکٹ میں سی کیٹگری دیے جانے پر اپنا شدید ردعمل ظاہر کیا تھا۔

پاکستان کرکٹ بورڈ نے یہ معاملہ ریٹائرڈ لیفٹننٹ جنرل منیر حفیظ کی سربراہی میں قائم ڈسپلنری کمیٹی کے سپرد کر دیا تھا۔ دونوں کھلاڑیوں نے کمیٹی کو وضاحت بھیج دی تھی تاہم کمیٹی نے ہفتے کے روز شعیب اختر کو طلب کیا تھا لیکن وہ کمیٹی کے سامنے پیش نہیں ہوئے۔

توقع یہی تھی کہ ہفتے کو پی سی بی کے گورننگ بورڈ کے اجلاس کے بعد شعیب اختر اور دانش کنیریا کے بارے میں فیصلہ سامنے آجائے گا لیکن پی سی بی کے چیئرمین ڈاکٹرنسیم اشرف نے پریس کانفرنس میں بتایا کہ فیصلے کا اختیار ڈسپلنری کمیٹی کو دے دیا گیا ہے جو شعیب اختر کا موقف سننے کے بعد فیصلہ سنائے گی۔

پاکستان کرکٹ بورڈ نے دانش کنیریا، یاسرعرفات اور راؤ افتخار کو کاؤنٹی کرکٹ کھیلنے کی اجازت بھی دے دی ہے البتہ فاسٹ بولر محمد آصف اور عمر گل کو فٹنس کی بنیاد پر کاؤنٹی کرکٹ کھیلنے کی اجازت نہ دینے کا فیصلہ کیا گیا ہے۔

پاکستان کرکٹ بورڈ کے چیئرمین کا کہنا ہے کہ کاؤنٹی کرکٹ کھیلنے کے بارے میں’ کیس ٹو کیس‘ کی بنیاد پر معاملہ نمٹایا جائے گا۔ ان کا کہنا تھا کہ دانش کنیریا، یاسرعرفات اور راؤ افتخار نے بورڈ کو کاؤنٹی کھیلنے کی اجازت دینے کے لئے درخواست دی تھی جبکہ محمد آصف اور عمرگل کی طرف سے ایسی کوئی درخواست بورڈ کو نہیں ملی ہے۔

پاکستان کرکٹ بورڈ نے سابق فرسٹ کلاس کرکٹر سلطان رانا کو ڈائریکٹر ڈومیسٹک کرکٹ بھی مقرر کیا ہے جو اس وقت ایشین کرکٹ کونسل کے ڈیویلپمنٹ افسر ہیں۔