عبدالرشید شکور بی بی سی اردو ڈاٹ کام، کراچی

	شعیب اختر میں اب بھی موثر بولر ہونے کی جھلک موجود ہے: لاسن

جیف لاسن جو بھارت کے خلاف سیریز کے بعد کرسمس منانے آسٹریلیا چلے گئے تھے بدھ کی شب پاکستان واپس پہنچے ہیں۔ ان کی آمد نے ان قیاس آرائیوں کو بھی ختم کردیا ہے جو پاکستان میں سکیورٹی کے خدشات کے ضمن میں ان کی واپسی میں تاخیر کے بارے میں کی جارہی تھیں۔

انہوں نے قائداعظم ٹرافی کے فائنل کے موقع پر جمعرات کو نیشنل اسٹیڈیم میں یونس خان سمیت پاکستانی کرکٹ ٹیم کے متعدد کھلاڑیوں سے ملاقات کی۔

اس موقع پر صحافیوں سے بات کرتے ہوئے جیف لاسن کا کہنا تھا کہ آسٹریلیا کے خلاف ہوم سیریز میں ابھی کافی وقت ہے اور اس مرحلے پر کچھ کہنا قبل ازوقت ہوگا۔ انہوں نے مزید کہا کہ وہ سمجھتے ہیں کہ عام انتخابات کے بعد کے حالات پر اس سیریز کا انحصار ہوگا۔

جیف لاسن نے کہا کہ ان کی پاکستان واپسی یہ ثابت کرتی ہے کہ وہ یہاں کے سکیورٹی حالات سے خوفزدہ نہیں ہیں اور خود کو محفوظ سمجھتے ہیں۔ انہوں نے کہا کہ آسٹریلیا میں انہوں نے سکیورٹی اور آسٹریلوی ٹیم کے پاکستان کے دورے کے ضمن میں چند آسٹریلوی کرکٹرز اور کرکٹ آسٹریلیا کے حکام سے غیررسمی بات چیت کی تھی۔

جیف لاسن نے کہا کہ وہ فیصلہ کرنے کے مجاز نہیں ہیں اور یہ فیصلہ کرکٹ آسٹریلیا نے کرنا ہے جو سکیورٹی کے ضمن میں بہت احتیاط سے جائزہ لے کر فیصلہ کرتا ہے۔ انہوں نے مزید کہا کہ کرکٹ آسٹریلیا کو کرکٹ کی اہمیت اور ملکوں کے درمیان تعلقات کا بھی بخوبی احساس ہے۔ وہ اپنا سکیورٹی وفد بھی پاکستان بھیجے گا۔

اس سوال پر کہ اگر آسٹریلوی کرکٹ ٹیم پاکستان نہیں آتی ہے تو کیا یہ سیریز آسٹریلیا میں یا نیوٹرل مقام پر ہونی چاہئے، جیف لاسن نے کہا کہ یہ فیصلہ کرنا کوچ اور کھلاڑیوں کا کام نہیں ہے بلکہ یہ خالصتاً انتظامی معاملہ ہے۔

آسٹریلیا میں سکیورٹی اور آسٹریلوی ٹیم کے پاکستان کے دورے کے ضمن میں چند آسٹریلوی کرکٹرز اور کرکٹ آسٹریلیا کے حکام سے غیررسمی بات چیت کی تھی۔ جیف لاسن

لاسن نے اس تاثر کو مسترد کردیا کہ شعیب اختر اپنا آخری ٹیسٹ کھیل چکے ہیں۔ انہوں نے کہا کہ شعیب اختر میں اب بھی موثر بولر ہونے کی جھلک موجود ہے اور ایک فٹ شعیب اختر آسٹریلیا کے خلاف سیریز میں اہم کردار ادا کرینگے۔

لاسن نے کپتان شعیب ملک کا بھی دفاع کیا اور کہا کہ وہ نوجوان ہے جس سے فوری طور پر اچھے نتائج کی توقع نہ کی جائے۔ ان کا کہنا تھا کہ وقت آنے پر شعیب ملک ایک بہترین کپتان ثابت ہوگا۔