برائن لارا نے اپنے ٹیسٹ کیرئر میں 11953 رن بنائے

ہفتے کو انگلینڈ کے خلاف سپر ایٹ مرحلے کا میچ اڑتیس سالہ لارا کے بین الاقوامی کرکٹ کیرئیر کا آخری میچ ہوگا۔ یہ لارا کے کیرئر کا 299واں ون ڈے میچ ہو گا۔

لارا نے ایک پریس کانفرنس سے خطاب کرتے ہوئے کہا’میں ہفتے کو بین الاقوامی کرکٹ کو الوداع کہ رہا ہوں اور میں اس سلسلے میں پہلے ہی بورڈ اور اپنے ساتھی کھلاڑیوں سے بات کر چکا ہوں‘۔

پہلے پہل لارا نے ون ڈے کرکٹ سے ریٹائرمنٹ کا اعلان کیا تھا اور خیال کیا جا رہا تھا کہ وہ مئی میں انگلینڈ کے خلاف چار ٹیسٹ میچوں کی سیریز میں شرکت کریں گے۔

برائن لارا نے اپنے ٹیسٹ کیرئر میں 11953 رن بنائے ہیں اور وہ ٹیسٹ اور فرسٹ کلاس میچوں میں سب سے بڑے سکور کے ریکارڈ کے مالک بھی ہیں۔ لارا وہ واحد کرکٹر ہیں جنہوں نے کسی ٹیسٹ میچ میں چار سو رن سکور کیے ہیں۔

جہاں بطور کھلاڑی لارا کی کارکردگی کے سب معترف ہیں وہیں بطور کپتان ان کی کارکردگی پر تنقید بھی ہوتی رہی ہے۔ اس حوالے سے لارا کا کہنا تھا’ مجھے ویسٹ انڈین کرکٹ بہت عزیز ہے۔ کپتانی میرے لیے ایک اچھا اور پر لطف تجربہ تھا‘۔

لارا کی ریٹائرمنٹ کے بعد اب ممکنہ طور پر نائب کپتان رام نریش سروان انگلینڈ کے خلاف سیریز میں ویسٹ انڈین ٹیم کی قیادت کا فریضہ سرانجام دیں گے۔