ماہرین کہتے ہیں کہ راہول ڈراوڈ جنوبی افریقہ کے خلاف ٹیسٹ سیریز میں دستیاب ہوں گے

اطلاعات کے مطابق راہول ڈراوڈ کی انگلی پر چوٹ لگی ہوئی ہے جس کے باعث وہ پانچ روزہ میچوں کی اس سیریز سے باہر ہوگئے ہیں۔ اس سیریز کا پہلا میچ بارش کی نذر ہوگیا تھا جبکہ اگلے دو میچ جنوبی افریقہ نے جیتے ہیں۔

راہول ڈراوڈ کی جگہ وریندر سہواگ انڈیا کی ٹیم کی کپتانی کریں گے جبکہ وی وی ایس لکشمن کو ٹیم میں شمولیت کے لیے فوری طور پر جنوبی افریقہ بلایا گیا ہے۔

انڈین کپتان جنوبی افریقہ کے خلاف اتوار کو کھیلے گئے تیسرے ایک روزہ میچ کے دوران سلپ میں فیلڈنگ کر رہے تھے کہ ان کی انگلی زخمی ہوگئی۔ ماہرین کہتے ہیں کہ ڈراوڈ ٹیسٹ سیریز کے لیے فٹ ہوجائیں گے۔

ادھر جنوبی افریقہ نے بوئیٹا کی جگہ بلے باز ایشویل پرنس کو ٹیم میں شامل کرنے کا فیصلہ کیا ہے۔ توقع ہے کہ ایشویل اگلے دو ایک روزہ میچوں میں کھیلیں گے۔

جنوبی افریقہ کی سیلیکشن کمیٹی کے چیئرمین ہارون لورگاٹ کا کہنا ہے کہ ایشویل کو اس لیے واپس ٹیم میں شامل کیا گیا ہے کہ اگر ٹاپ آرڈر کو بدلنا پڑے تو ایشویل کے تجربے سے فائدہ اٹھایا جا سکے۔

خیال رہے کہ جمعہ کو کھیلے جانے والے پرو 20 میچ میں ٹیم کے چھ سینئر کھلاڑیوں کو جن میں شان پولک بھی شامل ہیں آرام کا موقع دیا جائے گا۔