’اگر آپ گول نہ کریں، آپ میچ نہیں جیت سکتے‘

بدھ پانچ جولائی کوفرانس نے پرتگال کو ایک صفر سے ہرایا تھا۔ فرانس کے لیئے گول زیدان نے پینالٹی پر کیا تھا۔

اب پرتگال کا دوسرے سیمی فائنل میں ہارنے والی ٹیم جرمنی سےعالمی کپ میں تیسری پوزیشن کے لیئے مقابلہ ہوگا۔

سکولاری کا کہنا تھا کہ فرانس اس جیت کا حقدار تھا اور ’یہ بات ہمیں قبول کرنی ہوگی۔ ہمیں معلوم تھا کہ یہ ایک مشکل میچ ہوگا لیکن ہمارے پاس گول کے کئی مواقع تھا جو ہم نے ضائع کر دیے۔ اور اسی لیئے ہم ہار گئے۔

میچ کےاختتام پر ایسا لگا جیسے کہ سکولاری کی ریفری سے کچھ تلخ کلامی ہوئی ہو تاہم اس کے بارے میں انہوں نے بات کرنے سے انکار کر دیا۔

برازیل سے تعلق رکھنے والے سکولاری نے اس سوال کا بھی کوئی صاف جواب نہیں دیا کہ کیا وہ پرتگال کے کوچ کے حیثیت سے اپنا کام جاری رکھیں گے یا نہیں۔ ان کی اس عہدے کی مدت جولائی کے آخر میں ختم ہو جائے گی۔ سکولاری کا کہنا تھا کہ ’میرا کانٹریکٹ جولائی کے آخر تک ہے اور اس کے بعد کیا ہوتا ہے وہ دیکھا جائے گا۔‘