ہم ان کا ہر شعبے میں مقابلہ کر سکتے ہیں: باب وولمر

باب وولمر کا کہنا تھا کہ’یقینی طور پر انڈیا ایک آسان ٹیم نہیں ہے۔ وہ اس وقت بہت اچھا کھیل رہے ہیں تاہم ہمارے پاس ایسے کھلاڑی ہیں جو ان کا ہر شعبے میں مقابلہ کر سکتے ہیں‘۔

انڈیا نے اپنے گزشتہ گیارہ ون ڈے میچوں میں سے نو میں فتح حاصل کی ہے اور پاکستان اور انگلینڈ کو ون ڈے سیریز میں شکست دی ہے جبکہ پاکستان نے بھی اپنی گزشتہ پانچ میں سے چار ایک روزہ سیریز جیتی ہیں۔

سولہ ہزار تماشائیوں کی گنجائش والا ابوظہبی سٹیڈیم متحدہ عرب امارات میں شارجہ کے بعد دوسرا مقام ہے جہاں بین الاقوامی کرکٹ کھیلی جا رہی ہے اور پاکستانی ٹیم اس میدان پر فتح حاصل کرنے والی پہلی بین الاقوامی ٹیم بننا چاہتی ہے۔

باب وولمر کا کہنا ہے کہ’ ہم یقیناً اپنا نام اس میدان پر پہلے فاتح کے طور پر دیکھنا چاہتے ہیں‘۔

انڈین کپتان راہول ڈراوڈ کا کہنا ہے کہ’ انڈیا اور پاکستان کا مقابلہ ہمیشہ کانٹےدار رہا ہے اور یہ دونوں میچ بھی ایسے ہی ہوں گے‘۔

دو ایک روزہ میچ کھیلنے کے لیئے انڈیا اور پاکستان کی ٹیمیں ابوظہبی پہنچ چکی ہیں۔ پہلا میچ منگل کو جبکہ دوسرا بدھ کو کھیلاجائے گا اور پہلے میچ کی آمدنی پاکستان اور کشمیر کے زلزلہ متاثرین کو دینے کا فیصلہ کیا گیا ہے۔