مناء رانا بی بی سی اردو ڈاٹ کام، لاہور

	مشتاق نے انگلینڈ کے خلاف پاکستان کے سپن بالرز کی تربیت کی تھی

پاکستان کرکٹ بورڈ کے میڈیا ڈائریکٹر عباس زیدی کا کہنا ہے کہ یہ فیصلہ منگل کے روز کیا گیا۔ انہوں نے یہ بھی بتایا کہ مشتاق احمد کو بالنگ کوچ مقرر کرنے کی درخواست ٹیم کے کپتان انضمام الحق نے کی تھی۔

عباس زیدی کے مطابق مشتاق احمد کی خدمات محض پاک بھارت سیریز کے لیے ہیں اور یہ کوئی طویل المدت معاہدہ نہیں۔ پینتیس سالہ مشتاق احمد نے انگلینڈ کے خلاف بھی پاکستان کے سپن بالرز کی تربیت کی تھی۔

مشتاق احمد کو دو سال کے بعد انگلینڈ کے خلاف سیریز میں پاکستان کے سکواڈ میں رکھا گیا تھا لیکن انہیں کسی بھی میچ میں کھیلنے کا موقع نہیں دیا گیا اور بعد ازاں وہ ٹیم کی کوچنگ کرتے ہوئے دکھائی دیے۔

مشتاق احمد ٹیسٹ کرکٹ میں ایک سو پچاسی اور ایک روزہ میچوں میں ایک سو اکسٹھ وکٹیں حاصل کیں ہیں۔

پاکستان کے سابق کپتان عمران خان نے کئی بار پاکستان ٹیم کے فاسٹ بالروں کے لیے ایک بالنگ کوچ کی ضرورت کے بارے میں کہا لیکن پاکستان کرکٹ بورڈ شاید سپن بالنگ کوچ کو زیادہ اہمیت دے رہاہے۔

پاکستان کرکٹ بورڈ کے ڈائریکٹر میڈیا عباس زیدی کاکہناہےکہ چیئرمین پی سی بی نے عمران خان ، وسیم اکرم اور وقار یونس کو خطوط لکھےہیں کہ انہیں جب بھی وقت ملے وہ پاکستانی فاسٹ بالروں کی تربیت کےلیے آئیں اور چند دن پہلے عمران خان نے فاسٹ بالر محمد سمیع کو کئی مفید مشورے دیے ہیں۔