عبدالرشید شکور بی بی سی اردو ڈاٹ کام، لاہور

	بھارت نے ابھی تک پاکستانی تجویز کا جواب نہیں دیا ہے

بھارتی کرکٹ ٹیم جنوری میں پاکستان کے دورے پر آنے والی ہے اس دورے میں وہ تین ٹیسٹ اور پانچ ون ڈے انٹرنیشنل میچز کھیلے گی۔

پاکستان کرکٹ بورڈ کے ڈائریکٹر کرکٹ آپریشنز سلیم الطاف نے بی بی سی کو بتایا کہ انہوں نے بھارتی کرکٹ بورڈ کے نئے سیکرٹری نرنجن شاہ کو بدھ کے روز ایک خط بھیجا ہے جس میں بھارتی کرکٹ بورڈ کے نئے عہدیداروں کو مبارک باد کے علاوہ یہ یاد دہانی بھی کرائی ہے کہ بھارتی کرکٹ ٹیم کے دورۂ پاکستان میں اب بہت کم وقت رہ گیا ہے لہذا ٹور پروگرام کی منظوری میں مزید تاخیر مناسب نہیں۔

سلیم الطاف نے امید ظاہر کی کہ بھارتی کرکٹ بورڈ کے انتخابات کے بعد بھارتی ٹیم کے دورہ پاکستان کے پروگرام کو جلد حتمی شکل دے دی جائے گی۔

سلیم الطاف کا کہنا ہے کہ بھارتی کرکٹ بورڈ میں رونما ہونے والی تبدیلیوں سے بھارتی ٹیم کے دورے پر کوئی اثر نہیں پڑے گا کیونکہ یہ تبدیلیاں معمول کا حصہ ہوتی ہیں۔