عبدالرشید شکور بی بی سی اردو ڈاٹ کام، ملتان

	سڈنی کے مقابلے میں ملتان کی سنچری زیادہ اہم ہے

اکیس سالہ سلمان بٹ نے ملتان ٹیسٹ کی پہلی اننگز میں 74 اور دوسری اننگز میں 122 رنز بنائے ہیں جو ان کے سات ٹیسٹ پر مشتمل کیریئر کا بہترین اسکور ہے۔ اس سے قبل سڈنی ٹیسٹ میں انہوں نے108 رنز بنائے تھے۔

سلمان بٹ کا کہنا ہے کہ سڈنی کے مقابلے میں ملتان کی سنچری ان کے نزدیک زیادہ اہم ہے کیونکہ دوسری اننگز میں پریشر زیادہ ہوتا ہے۔ ان کے مطابق پہلی اننگز میں سنچری مکمل نہ کرنے کا انہیں افسوس تھا جس کے بعد سینیئر ساتھیوں نے انہیں مشورہ دیا تھا کہ وہ کریز پر رکنے کی کوشش کریں جس پر انہوں نے عمل کرنے کی کوشش کی۔

بائیں ہاتھ سے بیٹنگ کرنے والے سلمان بٹ کا کہنا ہے کہ انضمام الحق نے انہیں بہت حوصلہ دیا۔ ان کے آؤٹ ہونے کے بعد وہ وکٹ پر زیادہ سے زیادہ دیر ٹھہرکر رنز میں اضافہ کرنا چاہتے تھے لیکن جس گیند پر وہ آؤٹ ہوئے وہ ’سیم کے ساتھ کک‘ کرگئی۔

سلمان بٹ کا کہنا ہے کہ وہ پاکستان کے لیے طویل عرصے تک کھیلنا چاہتے ہیں اور ان کی خواہش ہے کہ پاکستانی ٹیم کے اوپننگ کے مسئلے کو حل کرنے میں مدد دیں۔

سلمان بٹ انڈر19 کرکٹ کے زینے کامیابی سے طے کرتے ہوئے پاکستانی ٹیم تک پہنچے ہیں۔ ٹیسٹ کے ساتھ ساتھ ون ڈے انٹرنیشنل میں بھی سلمان بٹ اپنی موجودگی کا احساس بھارت کے خلاف دوسنچریوں سے دلاچکے ہیں۔