عبدالرشید شکور بی بی سی اردو ڈاٹ کام، راولپنڈی

	مائیکل وان گھٹنے میں چوٹ کےسبب پہلا ٹیسٹ نہیں کھیل رہے ہیں

تاہم انگریز کپتان ابھی مایوس نہیں ہوئے ہیں اور ان کا کہنا ہے کہ وہ اگلے ہفتے تک اپنی فٹنس کے سلسلے میں حتمی فیصلہ کر سکیں گے۔

مائیکل وان کا کہنا ہے کہ گو کہ ان کے پوری طرح فٹ ہونے کے امکانات بہت کم ہیں لیکن وہ فٹ ہونے کے لیے آخری وقت تک انتظار کریں گے۔ اس سلسلے میں انہوں نے اگلے ہفتے کی ڈیڈ لائن مقرر کی ہے۔ اگر اس وقت تک وہ فٹ نہ ہوسکے تو انہیں واپس برطانیہ جانا پڑ ے گا۔

مائیکل وان اپنے نائب اور ملتان ٹیسٹ میں ٹیم کی قیادت کرنے والے مارکس ٹریسکوتھک کے لیے نیک تمنائیں رکھتے ہیں اور ان کا کہناہے کہ موجودہ حالات میں پوری ٹیم ٹریسکوتھک کے ساتھ ہے اور وہ اس چیلنج سے نمٹنے کے لیے تیار ہیں۔

مائیکل وان نے ٹریسکوتھک پر یہ بات بھی واضح کردی ہے کہ وہ جس طرح چاہیں ٹیم کی قیادت کر سکتے ہیں۔ ان کا کہنا ہے کہ یہ نامناسب ہوگا کہ ٹریسکوتھک کے کام میں کوئی مداخلت کی جائے۔