سائمن جونز نے دو گیندوں میں دو وکٹیں حاصل کیں

فالوآن کے بعد آسٹریلیا نے اپنی دوسری اننگز میں چار وکٹ کے نقصان پر دوسو بائیس رن بنائے ہیں۔

دوسری اننگز میں آسٹریلیا کے آؤٹ ہونے والے کھلاڑیوں میں ہیڈن، لینگر، ماٹن اور کپتان رکی پونٹنگ شامل ہیں۔

آسٹریلیا کی ٹیم اپنی پہلی اننگز میں انگلینڈ کے چار سو ستّتر رن کے خلاف دو سو اٹھارہ رن بنا کر آؤٹ ہوگئی۔ انگلینڈ کی جانب سے سائمن جونز نے پانچ ، ہوگارڈ نے تین جبکہ ہارمیسن اور فلنٹاف نے ایک، ایک وکٹ حاصل کی۔

آسٹریلیا کے آخری آؤٹ ہونے والے کھلاڑی بریٹ لی تھے جو سنتالیس رن بنا کر جونز کا پانچواں شکار بنے۔ شان ٹیٹ تین رن پر ناٹ آؤٹ رہے۔

کیسپرووچ بھی پانچ رن بنا کر جونز کی گیند پر آوٹ ہوئے۔ گلکرسٹ نے ستائیس رن بنائے۔ فلنٹاف کی گیند پر سٹراس نے ان کا شاندار کیچ لیا۔ آسٹریلیا کے آؤٹ ہونے والے چھٹے کھلاڑی سائمن کیٹچ پنتالیس رن بنا کر سائمن جونز کی گیند پر آؤٹ ہوئے۔ ان کے بعد شین وارن کھیلنے آئے لیکن وہ بنا کوئی رن بنائے سائمن جونز کا تیسرا شکار بنے۔

میچ کے دوسرے دن جب کھیل ختم ہوا تو ننانوے کے سکور پر آسٹریلیا کے پانچ کھلاڑی پویلین میں واپس جا چکے تھے۔اس سے قبل انگلینڈ کی پوری ٹیم اپنی پہلی اننگز میں چار سو ستتر رن بنا کر آؤٹ ہو گئی تھی۔

انگلینڈ کی جانب سے فلنٹوف نے شاندار بلے بازی کا مظاہرہ کرتے ہوئے سنچری بنائی۔ وہ ایک سو دو رن بنا کر آؤٹ ہوئے۔ وکٹ کیپر جونز نے بھی اچھی بیٹنگ کا مظاہرہ کیا اور پچاسی رن بنائے۔

اس میچ کے لیے آسٹریلیا نے اپنی ٹیم میں دو تبدیلیاں کی ہیں اور جیسن گلیسپی کی جگہ نئے کھلاڑی شان ٹیٹ کو ٹیم میں شامل کیا ہے جبکہ میگرا کی جگہ کیسپروچ کھیل رہے ہیں۔ انگلینڈ نے اپنی ٹیم میں کوئی تبدیلی نہیں کی۔

انگلینڈ ٹیم: مارکس ٹریسکوتھک، اینڈریو سٹراس، مائیکل وان، این بیل، کیون پیٹرسن، اینڈریو فلنٹاف، گیرئنٹ جونز، ایشلے جائلز، میتھیو ہوگارڈ، سٹیو ہارمیسن، اور سائمن جونز۔

آسٹریلوی ٹیم: جسٹن لینگر، میتھیو ہیڈن، رکی پونٹنگ، ڈیمیئن مارٹن، مائیکل کلارک، سائمن کیٹچ، ایڈم گلکرسٹ، شین وان، بریٹ لی،شان ٹیٹ اور کیسپروچ۔