جیروم ینگ کے ٹیسٹ 1999 میں بھی مثبت ثابت ہوئے تھے

اٹھائیس سالہ جیروم ینگ کے پیرس میں کیے جانے والے دو ٹیسٹ مثبت نکلے تھے جس کے بعد ان پر یہ پابندی عائد کی گئی ہے۔

ینگ پر ممنوعہ ادویات استعمال کرنے کا الزام سن انیس سو ننانوے میں بھی ثابت ہوچکا ہے اور عالمی ایتھلیٹک فیڈریشن کے قوانین کے تحت دوسری مرتبہ کسی ایتھلیٹ کے ملوث پائے جانے پر تاحیات پابندی عائد کی جاتی ہے۔

ینگ اس برس کے اولمپک کے لیے کوالیفائی نہ کرسکے تھے تاہم وہ سڈنی کے پچھلے اولمپکس میں چار سو میٹر ریلے ریس جیتنے والی ٹیم میں شامل تھے۔

اس ریس میں مائیکل جونسن بھی تھے اور اب خدشہ یہ ہے کہ اس ٹیم کو بھی جیروم ینگ کے شامل ہونے کی پاداش میں سونے کے تمغے سے محروم کیا جاسکتا ہے۔

کہا جاتا ہے کہ انہوں نے سڈنی اولمپکس میں حصہ لیتے ہوئے یہ نہیں بتایا تھا کہ ان کے 1999 کے ٹیسٹ مثبت نکلے تھے کیونکہ ان کے خلاف امریکی حکام نے ٹیسٹ مثبت ہونے پر کوئی کارروائی نہیں کی تھی۔