 |  یوحنا نے ایک سو سات رن بنائے |
پاکستان اور سری لنکا کے درمیان نیشنل اسٹیڈیم کراچی میں ہونے والے سہ فریقی ون ڈے سیریز کا میچ پاکستان نے آٹھ وکٹ سے جیت لیا ہے۔ سری لنکا نے نو وکٹ کے نقصان پر پچاس اوور میں دو سو بتیس رن بنائے تھے۔ پاکستان نے مطلوبہ ہدف دو وکٹوں کے نقصان پر انچاسویں اوور میں پورا کر لیا۔ پاکستان کی اننگز کی خاص بات یوسف یوحنا اور شعیب ملک کی شاندار شراکت تھی۔ یوحنا نے ایک سو سات اور شعیب ملک نے چھیاسی رن بنائے۔ پاکستان کی طرف سے سلمان بٹ اور یاسر حمید نے بیٹنگ کا آغاز کیا۔ دونوں اوپنر تینتیس کے سکور پر آؤٹ ہوگئے تھے۔ سری لنکا کی طرف سے جے سوریا نے سب سے زیادہ ترپن رن بنائے۔ کپتان مرون اتاپتو نے ٹاس جیت کر پہلے بیٹنگ کا فیصلہ کیا تھا۔ سری لنکا کو شروع میں ہی نقصان اٹھانا پڑا۔ ان کے اوپنر گونا وردنے نویدالحسن رانا کی پہلی ہی گیند پر بولڈ ہو گئے۔ اس کے بعد جے سوریا اور اتاپتو نے ٹیم کو سہارا دیا۔ اتاپتو نے چھیالیس رن بنائے۔ اتاپتو، جے ور دھنے اور تلکرتنے دلشن کو شعیب ملک نے آؤٹ کیا۔ محمد سمیع نے دو وکٹ لیں۔ پاکستانی ٹیم ان کھلاڑیوں پر مشتمل ہے۔ انضمام الحق( کپتان ) یاسرحمید، سلمان بٹ، شعیب ملک، یوسف یوحنا، یونس خان، عبدالرزاق، شعیب اختر، شاہد آفریدی، محمد سمیع اور رانا نویدالحسن۔ سری لنکن اسکواڈ میں یہ کھلاڑی شامل ہیں۔مرون اتاپتو( کپتان) سنتھ جے سوریا، مہیلا جے وردھنے، کمارسنگاکارا، تلکارتنے دلشن ، اوشکا گوناوردھنے،فرویز ماہروف،چمندا واس، اپل چندنا، نوآن سوئسا،کوشل لوکوآراچی۔ میچ کے امپائرز اسد رؤف اور مارک بینسن جبکہ میچ ریفری نیوزی لینڈ کے جیف کرو ہیں۔ سہ فریقی ون ڈے سیریز کے پہلے دو میچزمیں پاکستان نے زمبابوے کو شکست دی تھی۔ | 
یہ صفحہ دوست کو ای میل کیجیئے
پرِنٹ کریں
