عبدالرشید شکُور بی بی سی اردو ڈاٹ کام

پاکستان نے مصر کی ٹیم کو صفر کے مقابلے میں سات گول سے ہرایا تھا

پاکستان نے اولمپکس سےچند روز قبل سپین کو اسی کے ملک میں کھیلے گئے تین قومی ٹورنامنٹ میں شکست دی ہے۔ لیکن ہفتے کو اسپین کی ٹیم مختلف روپ میں اس کے سامنے آئےگی اور پاکستانی کھلاڑیوں کو جیت کے لئے تمام تر صلاحیتوں کو بروئے کار لانا ہوگا کیونکہ ہسپانوی ٹیم برطانیہ کو ایک کے مقابلے میں پانچ گول سے ہراکر پاکستان کے سامنے آئے گی۔

جرمنی کے ِخلاف پاکستان ٹیم اچھا کھیلنے کے باوجود نتیجہ اپنے حق میں نہ کرسکی لیکن جنوبی کوریا کے خلاف اس نے عمدہ کھیل پیش کیا جس کا نتیجہ اٹلانٹا اور سڈنی سے مختلف نظرآیا اور پاکستان ٹیم پہلی مرتبہ ایشین چیمپئن جنوبی کوریا کو اولمپکس میں ہرانے میں کامیاب ہوسکی۔

سپین کے خِلاف میچ میں بھی پاکستانی کوچز رولینٹ آلٹمینزاور طاہر زمان اپنے فارورڈز خصوصا ریحان بٹ اور پنالٹی کارنر ایکسپرٹ سہیل عباس سے توقعات وابستہ کئے ہوئے ہیں۔

طاہرزمان کا کہنا ہے کہ ریحان بٹ ذہین سٹرائیکر ہے ۔سہیل عباس جرمنی کے خلاف دونوں پنالٹی کارنرز پر گول کرنے میں ناکامی کے بعد اپنی فارم میں واپس آگئے ہیں اور مصر اور جنوبی کوریا کے خلاف میچوں میں ان کے پانچ گول نے پاکستان ٹیم کے حوصلے بلند کردیئے ہیں۔

سپین کے بعد پاکستان ٹیم پیر کو آخری گروپ میچ برطانیہ کے خلاف کھیلے گی۔