فاریہ عالم اپنی کہانی سے ایک ملین پاؤنڈ تک کی رقم کما سکتی ہیں

تعلقات عامہ کے ماہر میکس گلفورڈ کا کہنا ہے کہ فاریہ عالم ہی اپنی کہانی کسی اخبار یا ٹی وی چینل کو بیچیں گی۔

میکس کلفورڈ کے مطابق فاریہ عالم نے انہیں اپنا نمائندہ مقرر کیا ہے اور وہ اب ان کی پبلسٹی کے ذمہ دار ہوں گے۔

انگلینڈ کی فٹ بال ٹیم کے کوچ سوِن ارکسن اور فٹ بال ایسوس ایشن کے چیف ایگزیکٹو مارک پالیوس کے فاریہ عالم سے جنسی تعلقات کے بارے میں چھپنے والی خبروں نے فٹ بال کے حلقوں کو ہلا کر رکھ دیا تھا۔

اس سکینڈل کے منظر عام پر آنے کے بعد چیف ایگزیٹو مارک پالیوس اور رابطہ عامہ کے ڈائریکٹر کولن گبسن پہلے ہی اپنے عہدوں سے مستعفی ہو چکے ہیں۔

مونیکا لیونسکی نے برطانوی ادارے چینل فور نیوز سے ایک انٹرویو کے بدلے چار لاکھ پاؤنڈ وصول کئے تھے

گزشتہ ہفتے تعلقات عامہ کے ماہر میکس کلفورڈ نے کہا تھا کہ فاریہ عالم اپنی کہانی سے ایک ملین پاؤنڈ تک کی رقم کما سکتی ہیں۔

اطلاعات کے مطابق سنسی خیز خبریں چھاپنے کے لیے مشہور دو برطانوی ٹیبلائڈ اخبار اور ایک ٹیلی ویژن چینل فاریہ عالم کی سٹوری خریدنے میں بہت دلچسپی کا مظاہرہ کر رہے ہیں۔

اس سے پہلے امریکی صدر بل کلنٹن سے جنسی تعلقات کی وجہ سے بے پناہ شہرت حاصل کرنے والی مونیکا لیونسکی نے سن انیس سو ننانوے میں برطانوی ادارے چینل فور نیوز سے ایک انٹرویو کے بدلے چار لاکھ پاؤنڈ وصول کئے تھے جو اس سلسلے میں قائم ہونے والا ایک ریکارڈ ہے۔

مبصرین کا کہنا ہے کہ فاریہ عالم اپنی سٹوری بیچنے میں مونیکا لیونسکی کو مات دے دیں گی۔