 |  فٹ بال ایسوسی میں نوکری سے پہلے فاریہ عالم ایشیائی رسالوں کے لیے ماڈلنگ کرتی رہی ہیں |
گزشتہ چند روز سے انگلینڈ کی فٹ بال ایسوسی ایشن ایک جنسی سکینڈل کی زد میں ہے۔ اس سکینڈل کی وجہ سے ایسوسی ایشن کے چیف ایگزیکٹو پہلے ہی مستعفی ہو چکے ہیں جبکہ اور ڈائریکٹر اطلاعات نے عہدہ چھوڑنے کی پیش کش کی ہے۔ سکینڈل کے دوسری بڑے کردار قومی ٹیم کے کوچ سوِن ارکسن کی تقدیر کا فیصلہ کرنے کے لئے بورڈ کا ہنگامی اجلاس جمعرات کو طلب کیا گیا ہے۔ فٹ بال ایسوسی ایشن کے چیف ایگزیکٹو مارک پالیوس اور کوچ سوِن ارکسن پر الزام ہے انہوں نے سابقہ بنگلہ دیشی نژاد ماڈل اور ایسوسی ایشن کی سیکریٹری فاریہ عالم سے جنسی تعلقات قائم کئے اور جب ان کے تعلقات پر مبنی خبر شائع ہوئی تو انہوں نے اس پر جھوٹے تردیدی بیانات جاری کیے۔ فٹ بال ایسوسی ایشن کے بارے میں جنسی سکینڈل دو ہفتے پہلے اس وقت منظر عام پر آیا جب اتوار کو شائع ہونے والے ایک اخبار ’نیوز آف دی ورلڈ‘ نے یہ سنسی خیز انکشاف کیا کہ مارک پالیوس اور سوِن ارکسن کے فاریہ عالم سے تعلقات رہے ہیں۔ اس خبر کی اشاعت پر فٹ بال ایسوس ایشن نے ایک تردیدی بیان جاری کیا۔ لیکن اخبار اپنی خبر پر قائم رہا اور اس نے ثبوت کے طور فاریہ عالم کے اپنی ایک سہیلی کو بھیجے گئے وہ ای میل پیغام پیش کئے تو فٹ بال ایسوسی ایشن
نے تردیدی بیان واپس لے لیا۔ اس مرحلے پر جاری ہونے والے ایک بیان میں فٹ بال ایسوسی ایشن کے چیئرمین جیف تھامسن کے حوالے سے کہا گیا تھا کہ اس جنسی سکینڈل کی چھان بین کے لیے تحقیقات کا آغاز کر دیا گیا ہے۔ اس بیان میں یہ بھی کیا گیا کہ فٹ بال ایسوسی ایشن فاریہ عالم سے جنسی تعلقات کے حوالے سے چیف ایگزیکٹو مارک پالیوس کی وضاحت سے مطمئن ہے لیکن سوِن ارکسن کے خلاف کارروائی کا فیصلہ تحقیقاتی رپورٹ کی بنیاد پر جمعرات کو ہونے والی بورڈ کے اجلاس میں کیا جائے گا۔ فٹ بال ایسوس ایشن کے اعلیٰ عہدیداروں کے جنسی تعلقات سے متعلق اس کہانی نے اس وقت ایک نیا موڑ لے لیا جب گزشتہ اتوار کو ’نیوز آف دی ورلڈ‘ نے فٹ بال ایسوسی ایشن کے ڈائریکٹر اطلاعات کولن گبسن سے ہونے والی گفتگو کا متن چھاپا جس میں انہوں نے اخبار سے درخواست کی تھی کہ وہ چیف ایگزیکٹو مارک پالیوس سے متعلق تفصیلات خبر سے نکال دے۔ اس کے بدلے میں اخبار کو کوچ سوِن ارکسن کے بارے میں تمام تفصیلات اور فاریہ عالم کے اقبالی انٹرویو کی پیش کش کی گئی تھی۔ گفتگو کا متن شائع ہونے کے بعد فٹ بال ایسوسی ایشن کے چیف ایگزیکٹو مارک پالیوس اپنے عہدے سے مستعفی ہو گئے ہیں جبکہ اور ڈائریکٹر اطلاعات کولن گبسن نے اپنا عہدے چھوڑنے کی پیش کش کی ہے۔ | 
یہ صفحہ دوست کو ای میل کیجیئے
پرِنٹ کریں
