گول نہ کر سکنے پر بیکھم گراؤنڈ میں مایوس لیٹے ہیں

یورو کپ کے کوارٹر فائنل کے دوران انگلینڈ کے مایہ ناز فٹ بالر ڈیوڈ بیکہم پرتگال کے خلاف پینلٹی سٹروک سے گول نہیں کر سکے تھے اور یوں انہوں نے انگلینڈ کی فتح کا ایک سنہری موقع ضائع کردیا تھا۔

واضع رہے کہ کوارٹر فائنل کا یہ میچ ایکسٹرا ٹائم کے بعد بھی جب دو دو گول سے برابری کے باعث فیصلہ کن نہیں ہو سکا تھا تو دونوں ٹیموں کو پینلٹی شوٹ آؤٹ کا موقعہ دیا گیا۔

انگلینڈ کی جانب سے کپتان ڈیوڈ بیکہم نے پہلا کک لیا لیکن گیند دائیں جانب گول پوسٹ کے انتہائی اوپر سے تماشائیوں کے درمیان جا گری۔

دلچسپ بات یہ ہوئی کہ جس تماشائی کے ہاتھ یہ گیند آئی وہ اسے لے کر اسٹیڈیم سے رفو چکر ہو گیا۔ پیبلو کورل نامی اسی تماشائی نے ویب سائٹ پر اس تاریخی گیند کو نیلامی کے لیے پیش کیا تھا۔

پیبلو میچ کے دوران سٹییڈیم کی سترہ نمبر رو میں بیٹھا تھا۔

اس میچ میں انگلینڈ کو شکست دیکر پرتگال سیمی فائنل میں داخل ہو گیا تھا۔

پیبلو کا کہنا ہے کہ وہ اس گیند کو بیچ کی ایک نئی گاڑی خریدنا اور چھٹیوں کے لیے کسی پر فضا مقام کا دورہ کرنا چاہتے ہیں۔