عبدالرشید شکور بی بی سی اردو ڈاٹ کام کراچی

پاکستانی باکسروں نے عمدہ کار کردگی کا مظاہرہ کیا

میزبان ملک نے اس ٹورنامنٹ کا اختتام شاندار انداز میں کیا جس میں ایشیا کے 27 ممالک کے 133 باکسرز شریک تھے ۔ پاکستان کے علاوہ قازقستان نے دو جبکہ جنوبی کوریا ، تھائی لینڈ ، چین اور ازبکستان نے ایک ایک گولڈ میڈل جیتا۔

اس ٹورنامنٹ کے فائنلز کھیلنے والے 18 باکسرز پہلے ہی ایتھنز اولمپکس کے لئے کوالیفائی کرچکے تھے۔

بدھ کو کے پی ٹی اسپورٹس کمپلیکس میں کھیلے جانے والے فائنلز میں پاکستانی باکسرز نے شاندار پرفارمنس دی۔

تینوں باکسرز چین اور فلپائن میں ہونے والے کوالیفائنگ مقابلوں میں ناکام رہے تھے اور ان کے لئے اولمپکس تک رسائی حاصل کرنے کا یہ آخری موقع تھا جسے انہوں نے ہاتھ سے جانے نہیں دیا۔

سہیل بلوچ کا کھیل اپنے دیگر ساتھیوں سے زیادہ متاثرکن اور جارحانہ رہا۔ انہوں نے فیدر ویٹ کیٹگری میں اپنے حریف کرغزستان کے اسیلبخش تلاسبیف کو آؤٹ کلاس کردیا اور 12 کے مقابلے میں 32 پوائنٹس سے کامیابی حاصل کی۔

فیصل کریم جن کے چھوٹے بھائی نعمان کریم نے بھی اولمپکس کے لئے کوالیفائی کیا ہے روایتی حریف بھارت کے وجیندر سنگھ کو 13 کے مقابلے میں 33 پوائنٹس سے ہرانے میں کامیاب ہوگئے۔

احمد علی نے گزشتہ باؤٹ کے مقابلے میں اس مرتبہ بہتر کارکردگی دکھائی اور تھائی لینڈ کے ایس پساتھی کو 32 کے مقابلے 42 پوائنٹس سے شکست دی ۔

اس ٹورنامنٹ کے ساتھ ہی ایتھنز اولمپکس کے لئے باکسرز کے کوالیفائی کرنے کا عمل اختتام کو پہنچا اور اولمپکس میں حصہ لینے والے 286 میں سے ایشیا کے باکسرز کی تعداد 62 ہوگی۔