عدنان عادل بی بی سی اردو ڈاٹ کام، لاہور

وسیم اکرم بھارت کے ایک ٹی وی چینل کے لیے کمنٹری کے فرائض بھی انجام دئے رہے ہیں

وسیم اکرم کے وکیل فواد چودھری نے بی بی سی کو بتایا کہ اس مقدمہ کا کوئی سمن وسیم اکرم کو آج تک نہیں ملا اور دیوانی عدالت میں لاکھوں مقدمات زیرسماعت ہوتے ہیں اس لیے انھیں اس مقدمہ کا پتا نہیں چل سکا کہ وہ کس عدالت میں لگا ہوا ہے۔

وکیل نے کہا کہ وہ کل عدالت میں اس فیصلہ کے خلاف اور مقدمہ کی دوبارہ سماعت کے لیے درخواست دیں گے۔ وکیل کا کہنا تھا کہ وسیم اکرم نے تو ایسے کسی اشتہار میں کام ہی نہیں کیا۔

سول جج مشیر راؤ نے وسیم اکرم کو دیوانی مقدمہ میں سزا سنائی تھی جس میں کہا گیا تھا کہ وسیم اکرم نے بھارت کی ایک شراب بنانے والی کمپنی میں ماڈل کے طور پر کام کیا جس سے پاکستانی قوم کے مذہبی جذبات مجروح ہوۓ ہیں۔

درخواست گزار لاہور کے ایک شہری فیاض احمد نے عدالت سے کہا تھا کہ وسیم اکرم انھیں پچیس ہزار جرمانہ کے طور پر ادا کریں اور قوم سے معافی مانگیں۔

عدالت نے وسیم اکرم کو طلب کرنے کے لیے اخبارات میں اشتہار دیئے اور ان کے سمن جاری کیے لیکن وہ عدالت میں پیش نہ ہوۓ جس پر گزشتہ روز عدالت نے ان کی عدم موجودگی میں انہیں جرمانے اور قوم سے معافی مانگنے کی سزا سنادی۔