یہ صفحہ دوست کو ای میل کیجیئے		پرِنٹ کریں

ٹیم کے سلیٹکٹرز کو رشوت دینے کے الزامات کے بعد بھارتی کرکٹ ٹیم کے بلے باز ابھیجیت کالے کے فرسٹ کلاس کرکٹ کھیلنے پر اس وقت تک پابندی عائد کر دی گئی ہے جب تک انکوائری یہ فیصلہ نہیں کر لیتی کہ الزام صحیح ہے یا غلط۔

ابھیجیت کالے پر الزام ہے کہ انہوں نے سیلیکٹرز کرن مورے اور پراناب رائے کو بارہ ہزار آٹھ سو پاؤنڈ (تقریباً دس لاکھ بھارتی روپے) دینے کی پیش کش کی تھی تاکہ انہیں آسٹریلیا کا دورہ کرنے والی بھارتی ٹیم میں شامل کر لیا جائے۔

کالے نے ان الزامات کے صحت سے انکار کیا ہے اور کہا ہے کہ انہیں ان باتوں سے شدید دھچکہ لگا ہے۔

کالے پر لگنے والے الزامات کی انکوائری بھارتی بار کونسل کے سربراہ کریں گے اور توقع ہے کہ یہ انکوائری دو ہفتوں میں مکمل ہوگی۔

بھارت کرکٹ کے صدر جگ موہن ڈالمیا کا کہنا ہےکہ مذکورہ سلیکٹرز نے یہ معاملہ گزشتہ ہفتے ان کے سامنے رکھا تھا۔ گزشتہ رات بورڈ کے صدر کو اس سلسلے میں تحریری شکایت بھی موصول ہوگئی۔

سن دو ہزار دو میں میچ فکسنگ کے معاملے کا بعد بھارتی کرکٹ میں یہ سب سے بڑا سکینڈل سمجھا جا رہا ہے۔ پہلے سکینڈل کے بعد اس وقت کے کپتان محمد اظہر الدین اور ٹیسٹ کھلاڑی اجے شرما کے کرکٹ کھیلنے پر تا حیات پابندی عائد کر دی گئی تھی جبکہ اجے جڈیجہ اور منوج پربھارکر پر یہ پابندی پانچ سال کے لئے لگائی گئی تھی۔

اظہر اور جڈیجہ نے اس پابندی کو اعلیٰ عدالتوں میں چیلنج کر رکھا ہے اور کچھ عرصہ قبل دہلی کے ہائی کورٹ نے جڈیجہ کو مقدمے کا حتمی فیصلہ آنے تک بھارت میں کرکٹ کھیلنے کی اجازت دے دی تھی۔

ابھیجت کالے کہتے ہیں کہ وہ ان سلیکٹرز سے کبھی ملے بھی نہیں جن کو رشوت دینے کا الزام ان پر لگایا گیا ہے۔

ٹیم کے کپتان سہراو گنگولی نے کہا ہے کہ ان کے خیال میں الزام درست نہیں ہے جس سے ایک طرح کالے کی حمایت ہوئی ہے۔

کالے بھارت کے اندر بہترین بلے باز ہیں اور انہوں نے اٹھاون اعشاریہ سڑسٹھ کی اوسط سے چھ ہزار آٹھ سو رنز بنائے ہیں جن میں چوبیس سنچریاں شامل ہیں۔ تاہم بین الاقوامی سطح پر انہوں نے صرف بنگلہ دیش کے خلاف ایک میچ کھیلا ہے جس میں وہ نو رنز بنا سکے تھے۔