اخلاق احمد کراچی

محفوظ منتقلیِ خون انتہائی ضروری ہے

کراچی میں ’بلڈ بینکنگ‘ پر منعقد ہونے والے ایک بین الاقوامی سمپوزیم میں بتایا گیا کہ ملک بھر کے خون فراہم کرنے والے اداروں میں صرف ایک فیصد بلڈ بینک ایسے ہیں جہاں خون کو سٹور کرنے کی مناسب سہولیات موجود ہیں۔

اس طرح بہت کم بلڈ بینک خون میں موجود خطرناک بیماریوں کا سراغ لگانے کے ساز و سامان سے لیس ہیں۔

جناح پوسٹ گریجویٹ میڈیکل سینٹر کے ڈاکٹر سید عبدالمجیب کے مطابق پاکستان میں ہر سال خون کی پندرہ لاکھ بوتلوں کی ضرورت پڑتی ہے۔ ان کا کہنا تھا کہ اس میں سات سے دس ہزار بوتلیں غیر محفوظ ہوتی ہیں کیونکہ ان میں ہیپاٹائٹس او ایچ آئی وی ایڈز کے انفیکشن والا خون ہوتا ہے۔

محفوظ منتقلیِ خون سے متعلق قانون کی ضرورت ہے

امریکی بورڈ آف پیتھالوجسٹس کے ڈاکٹر جمیمز پرکنز کا خیال تھا کہ پاکستان میں خون کی قلت پر قابو پانے کے لئے ضروری ہے کہ خون کے اجزاء کی تیاری کا کام تیزکیا جائے۔ جس مریض کو صرف سرخ خلیوں کی ضرورت ہو، اسے مکمل خون دینا غیرضروری اقدام ہے۔ خون کے اجزاء اگر الگ کر لئے جائیں تو ایک بوتل خون سے تین یا چار مریضوں کی ضرورت پوری ہو سکتی ہے۔

انہوں نے کہا کہ محفوظ خون کی فراہمی، موت کی دہلیز پر کھڑے مریضوں کے لئے زندگی کی نوید ہوتی ہے۔ اس سے بالخصوص کینسر کے مریضوں او لوکیمیا کے شکار بچوں کو بہت فائدہ ہوتا ہے۔

ڈاؤ یونیورسٹی آف ہیلتھ سائنسز کے وائس چانسلر پروفیسر مسعود حمید خان نے امید ظاہر کی کہ سندھ اسمبلی نے حال ہی میں محفوظ منتقلیِ خون کا جو قانون منظور کیا ہےاس سے غیر منظور شدہ بلڈ بینکوں کے ساتھ ساتھ خطرناک امراض پر بھی قابو پایا جا سکے گا۔

انیس سو ستر کے عشرے تک خون فراہم کرنے کا کاروبار پیشہ ور لوگوں کے ہاتھ میں تھا جو اپنا خون فروخت کیا کرتے تھے۔ انیس سو چھہتر میں ڈاؤ میڈیکل کالج کے چند طلباء نے پیشنٹ ویلفیئر ایسوسی ایشن کی بنیاد رکھی تاکہ عام لوگوں کو خون کا عطیہ دینے پر مائل کیا جا سکے اور مریضوں کو بیماریوں سے محفوظ خون فراہم کیا جا سکے۔

شکاگو یونیورسٹی بلڈ بینک کے ٹیکنیکل ڈائریکٹر پروفیسر ایم اے پوتھیا والا نے محفوظ منتقلیِ خون کے سلسلے میں قوانین اور معیار مرتب کرنے کی ضرورت پر زور دیا اور کہا کہ ایک بڑے بلڈ بینک کو خون کی سکریننگ کے تمام جدید آلات سے لیس کرنے پر دس لاکھ روپے لاگت آتی ہے۔